Մելիքը Էջմիածնից առևանգել է իրեն մերժող աղջկան՝ իմանալով, որ նա պատրաստվում է նշանվել երևանցու հետ

1in.am-ը գրում է.

Վերաքննիչ քրեական դատարանում ավարտվել է Մելիք Բ.- ի ու նրա հորեղբորորդիների գործով բերված վերաքննիչ բողոքի քննությունը:

Գործը քննվել է Արմավիրի մարզի ընդհանուր իրավասության դատարանում Արթուր Ադամյանի նախագահությամբ:

Ըստ դատական ակտի՝ 28-ամյա Մելիք Բ.-ն ընտանիքի հետ բնակվել է Արմավիրի մարզի գյուղերից մեկում: Նա ճանաչել ու համակրել է Էջմիածնի բնակչուհի Աշխենին (անունը փոխված է): Մելիքը ցանկացել է ամուսնանալ Աշխենի հետ: 2015 թվականի դեկտեմբերին նա ծնողների հետ գնացել է Աշխենի տուն, խնդրել են աղջկա ձեռքը, բայց մերժում են ստացել:

Դրանից հետո Մելիքը չի հանձնվել, անընդհատ գնացել է Աշխենի աշխատավայր, փորձել է համոզել նրան, որ մտերմություն անեն, իրար լավ ճանաչեն՝ հետագայում ընտանիք կազմելու նպատակով: Մելիքի փորձերը՝ զրուցել Աշխենի հետ, անհաջողության են մատնվել, աղջիկը կտրուկ մերժել է նրան:

2016 թվականի փետրվարին Մելիքն իմացել է, որ Աշխենը պատրաստվում է նշանվել երևանցի մի տղայի հետ: Մելիքը որոշել է չհանձնվել, առևանգել աղջկան ու նրա հետ ամուսնանալ:

Իր մտադրության մասին Մելիքը հայտնել է հորեղբորորդիներ Արմանին ու Արթուրին: Խնդրել է օգնել իրեն: Արմանն ու Արթուրը համաձայնել են:

2016 թվականի փետրվարի 22-ին, ժամը 19-ի սահմաններում Մելիքը Արմանի ու Արթուրի հետ, վերջինիս վարած «Մերսեդեսով» Էջմիածին՝ Աշխենի աշխատավայր է գնացել: Որոշ ժամանակ սպասել են: Նկատել են, որ Աշխենը երկու ընկերուհիների հետ դուրս է եկել աշխատանքի վայրից:

Տղաները մեքենայով հետևել են Աշխենին: Շինանյութի խանութի մոտ Արթուրը կանգնեցրել է մեքենան մայթով անցնող Աշխենի կողքին: Մելիքն իջել է մեքենայից, մոտեցել է Աշխենին, բռնություն գործադրելով՝ աղջկա ձեռքերից ու կոնքից բռնելով, նրա կամքին հակառակ՝ նստեցրել է մեքենա: Արթուրն անմիջապես մեքենան ընթացքի մեջ է դրել:

Աղջկան առևանգել և տեղափոխել են Արմավիրի մարզի Ամբերդ գյուղի դաշտամիջյան հատված: Աղջիկը չի համաձայնել Մելիքի հետ ընտանիք կազմելու առաջարկին:

Մելիքի հայրիկի հորդորով որոշ ժամանակ անց առևանգողները վճռել են Աշխենին վերադարձնել Էջմիածին: Այնտեղ հանդիպել են Աշխենի հարազատներին, քաշքշուկ ու վիճաբանություն է եղել, փոխադարձաբար իրար ծեծել են… Դեպքի վայր են հասել ոստիկանները ու բերման են ենթարկել ոստիկանության Վաղարշապատի բաժին:

Ընդհանուր իրավասության դատարանում ամբաստանյալներն իրենց մեղավոր են ճանաչել, նրանց միջնորդությամբ գործը քննվել է արագացված ընթացակարգով:

Տուժողը չի առարկել, հայտնել է, թե բողոք չունի:

Ամբաստանյալները մեղավոր են ճանաչվել խմբի կազմում մարդու բացահայտ առևանգման համար՝ ՀՀ քրեական օրենսգրքի 131 հոդվածի 2-րդ մասի 1-ին կետով, ու դատապարտվել են 4-ական տարի ազատազրկման:

Ամբաստանյալներից երկուսի՝ Արմանի ու Արթուրի նկատմամբ կիրառվել է պայմանական դատապարտություն, յուրաքանչյուրի համար սահմանվել է 2 տարի փորձաշրջան:

Իսկ Մելիք Բ.-ն՝ առևանգման կազմակերպիչն ու գլխավոր գործող անձը, դատապարտվել է 4 տարի իրական ազատազրկման: Նա կալանքի տակ է առնվել հենց 2016 թվականի փետրվարի 22-ին, այդ օրվանից էլ կհաշվվի նրա պատժի սկիզբը:

Այս դատավճռի դեմ վերաքննիչ բողոք էր բերել Մելիք Բ.-ի շահերի պաշտպանը՝ խնդրելով հաշվի առնել իր պաշտպանյալի անձը, վատառողջ լինելը, այլ մեղմացնող հանգամանքներ և նրա նկատմամբ նույնպես կիրառել պայմանական դատապարտություն՝ սահմանելով փորձաշրջան:

Վերաքննիչ դատարանում պաշտպանի բողոքը քննվեց մեղադրողի ու տուժողի բացակայությամբ՝ վճռաբեկության կարգով:

Վերաքննիչ քրեական դատարանը մերժեց պաշտպանի բողոքը՝ անփոփոխ թողնելով ընդհանուր իրավասության դատարանի դատավճիռը՝ 4 տարի իրական ազատազրկումով: