Կարելի է նաև փողոց դուրս գալ, ի՞նչ է եղել. Լևոն Զուրաբյան

Վաղը ընդդիմության, քաղաքացիական հասարակության եւ իշխանության ներկայացուցիչների մասնակցությամբ կմեկնարկեն 4+4+4 ձեւաչափով քննարկումները, որ վերաբերելու են Ընտրական օրենսգրքի փոփոխություններին:

Հանդիպումը կմեկնարկի 17:30-ին՝ Ազգային ժողովում: Ինչպես այսօր հրավիրված ասուլիսում լրագրողներին հայտնեց ՀԱԿ խմբակցության ղեկավար Լեւոն Զուրաբյանը՝ այդ մասին այսօր առավոտյան հեռախոսով իրեն տեղեկացրել է ՀՀԿ խմբակցության պատգամավոր Հովհաննես Սահակյանը:

Մինչ այժմ, սակայն, դեռեւս նույնիսկ պարզ չեն ոչ հանդիպման մասնակիցների անունները, ոչ էլ ֆորմատը (բաց, փակ): Ըստ նախնական տեղեկությունների՝ իշխանությունը որոշել է հանդիպումները փակ անցկացնել, սակայն հայտնի է, որ որոշ ուժերի եւ քաղհասարակության շրջանում կար նաեւ քննարկումները բաց, հրապարակային անցկացնելու պահանջ:

Այս կապակցությամբ մեր հարցին ի պատասխան Լեւոն Զուրաբյանն ասաց, որ իրենք պահանջելու են այդ հանդիպումների ուղիղ եթերով հեռարձակում:

«Ի՞նչ խնդիր կա, մենք իրականում ոչ մի բան չունենք թաքցնելու մեր հասարակությունից: Եթե չհեռարձակվի էլ որեւէ բան հնարավոր չի լինի թաքցնել, բայց լրացուցիչ երաշխիքների համար, նաեւ նրա համար, որ բոլորը հետեւեն այս գործընթացին՝ առաջարկում ենք պարզ բան. ասում ենք եկեք կամերաների առաջ քննարկենք»,- ասաց ՀԱԿ ներկայացուցիչը: Մեր հարցին՝ եթե իշխանությունը չբավարարի այդ պահանջը, ապա հնարավո՞ր է հանդիպումը չեղյալ համարվի՝ Զուրաբյանը պատասխանեց. «Մենք նախապայման դա չենք կարող դարձնել, որովհետեւ անգամ եթե իշխանությունները հրաժարվեն այդ հեռարձակումից, կան բավականին լուրջ երաշխիքներ, որ հասարակությունը կիմանա ինչ է այնտեղ կատարվում: Դա իրենց ամոթը կլինի, եթե հրաժարվեն»:

Ինչ վերաբերում է մասնակիցներին. այս կապակցությամբ եւս դեռեւս հստակություն չկա: Մամուլի հրապարակումների համաձայն՝ ՀՀԿ-ից բանակցություններին մասնակցելու են ՍԴ ներկայացուցիչ Վարդան Պողոսյանը, Ընտրական օրենսգրքի նախագծի համահեղինակ Դավիթ Հարությունյանը, Հովհաննես Սահակյանը եւ մեկ ներկայացուցիչ ՀՅԴ-ից:

Քաղաքացիական հասարակությունը հրապարակել է իր ներկայացուցիչների անունները: Իսկ թե ով է լինելու ընդդիմադիր քառյակում՝ դեռեւս նույնիսկ Զուրաբյանին հայտնի չէ: Համենայնդեպս այդ կապակցությամբ հարցին նա այսօր շատ ընդհանուր մի պատասխան տվեց. «Ամեն խմբակցությունից մեկ ներկայացուցիչ: «Ժառանգության» դեպքում (այնտեղ գիտեք, մի քիչ բարդ իրավիճակ է)... դա ի վերջո «ժառանգություն» կուսակցության խմբակցությունն է, անգամ եթե չկա խմբակցության ղեկավար՝ պետք է հրավերը ուղարկել կուսակցության ղեկավարին: Թող կուսակցությունը որոշի ով է մասնակցում այդ բանակցություններին»,- ասաց Զուրաբյանը՝ նկատելով, որ իշխանությունը պարտավոր է բացի բանավորից նաեւ պաշտոնական գրությամբ կողմերին հրավերներ ուղարկել հանդիպման վերաբերյալ:

Հիշեցնենք, որ ՕԵԿ-ը, ՀԱԿ-ը եւ «Ժառանգությունը» 5 միասնական պահանջի շուրջ համախմբվել են, իսկ ԲՀԿ-ն չի միացել այս պահանջներին՝ նշելով, որ իրենք 30 պահանջ ունեն:

Հարցին, թե այսպիսի իրավիճակում վաղվա հանդիպմանը ի՞նչ օրակարգով է հանդես գալու ընդդիմությունը՝ Զուրաբյանը պատասխանեց.

«Ես չեմ կարող ուրիշների անունից խոսել: Մենք այնտեղ չենք գնում տեխնիկայի մեջ մտնելու եւ այլն, մենք գնում ենք այնտեղ քաղաքական բանակցությունների, որոնց նպատակը լինելու է 5 պահանջների իրագործումը»:

Զուրաբյանից հետաքրքրվեցինք՝ այդ դեպքում ինչպիսի՞ արդյունքի կամ իրենց քանի՞ պահանջի ընդունման դեպքում կհամարեն, որ բանակցությունները կայացած են:

«Ես բացարձակ հիմա չեմ ասելու, որ եթե այ էս պահանջները բավարարվեն, ուրեմն մենք բավարար....Մենք բոլորս տրամաբանող մարդիկ ենք, տեսնում ենք՝ էս բաները որ ապահովվեն՝ ընտրակեղծարարություն հնարավո՞ր է, թե ոչ: Եթե գտնվի ընդունված առաջարկների էդպիսի մի փաթեթ, որը մեզ համոզում է, որ էս բազայի վրա ընտրակեղծարարությունը շատ դժվար է անել՝ մենք կհամաձայնվենք, բայց ես դա չեմ ուզում ասել: Դա պետք է քննարկվի: Կարող են ընդդիմության մեջ էլ վեճեր լինեն. մեկն ասի սա է կարեւր երաշխիքը, մյուսն ասի՝ սա է, իրար փորձենք համոզել՝ ինչ-որ բանի գանք»,- ասաց Զուրաբյանը՝ ընդգծելով, որ իրենք ճկուն են, դոգմաներ չունեն, բայց եւ չեն զոհաբերի հանրության պահանջը:

Մեր մյուս հարցին, թե եթե կոնսենսուսը հաջողված չհամարեն, ապա ի՞նչ գործողություններ կհետեւեն դրան՝ ՀԱԿ ներկայացուցիչն այսպիսի պատասխան տվեց.

«Եթե տեսնենք, որ իշխանությունները սա վերածում են նոր շոուի եւ ընդամենը փորձում են զբաղվել իմիտացիայով, փորձում են ուղղակի միջազգային հանրությանը համոզել, որ իրենք պատրաստ են կոմպրոմիսների, բայց իրականում դրա տակը ոչ մի բան չկա, էդ դեպքում մենք մեր եզրակացությունները շատ արագ կանենք եւ համապատասխան քայլեր էլ կառաջարկենք»:

Նրա կարծիքով իշխանություններից որեւէ զիջում կորզելը լինելու է շատ դժվար, որովհետեւ նրանք հասկանում են, որ ամեն մի պահանջի բավարարումը նեղացնում է ընտրակեղծարարության բազան:

«Ամեն մի պահանջի բավարարումը նշանակելու է 4-5 պատգամավոր կորցրին: Իսկ ցուցակների հրապարակման պահանջի իրագործումը դա նշանակում է, որ համարյա վերջ ընտրակեղծարարությանը, համարյա 60-70 տոկոսը ընտրակեղծարարության կվերանա: Հիմա մենք պետք է գնանք եւ կռիվ տանք, որ իրագործվի, իսկ եթե չիրագործեն՝ դե ես չեմ ուզում որեւէ բան ասել, որը կընկալվի որպես շանտաժ»,- նկատեց ՀԱԿ խմբակցության ղեկավարը՝ հավելելով, որ «եթե լինի փոխադարձ համաձայնություն հասարակական կազմակերպությունների, քաղաքական ուժերի միջեւ՝ կարելի է նաեւ փողոց դուրս գալ, ի՞նչ է եղել»:

Աղբյուրը - Հայկական ժամանակ