2017 թ. դատապարտվածների մեծամասնությունը երիտասարդներ են. «Փաստ»

«Փաստ» օրաթերթը գրում է.

Ըստ ՀՀ դատական դեպարտամենտի ամփոփ տեղեկատվության, հանրապետությունում 2017թ. դատապարտվածների թվաքանակը կազմել է 2410 մարդ, որից 181–ը կանայք են: Նշվածներից 96–ը դատապարտվելու պահին եղել է անչափահաս, որից 4–ը` իգական սեռի: Այս մասին տեղեկանում ենք Ազգային վիճակագրական ծառայության կայքից:

Համաձայն ուսումնասիրության՝ 258 անձանց վերաբերյալ գործերը կարճվել են, 61 անձ արդարացվել է, 50 անմեղսունակների նկատմամբ կիրառվել են բժշկական բնույթի հարկադրական միջոցներ:

Ազատազրկված դատապարտվածների թվաքանակը կազմել է 1410 մարդ: Դատապարտվածների ընդհանուր թվաքանակից 859–ի նկատմամբ նշանակված պատիժը պայմանականորեն չի կիրառվել (50–ը՝ անչափահաս), 3–ի նկատմամբ կիրառվել է համաներման ակտ:

Դիտելով ուսումնասիրությունը՝ տեսնում ենք, որ նախորդ տարի դտապարտվածների մեծամասնությունը երիտասարդներ են: 2410–ից 1031–ը 18–29 տարեկան մարդիկ են, տակավին երիտասարդ, նոր–նոր կյանք մտնող քաղաքացիներ: Դատապարտվածների տարանջատումը կատարվել է նաև ըստ զբաղվածության տեսակի, և պարզվել է, որ նախորդ տարի դատապարտվածների մեծ մասը չաշխատող ու չսովորող աշխատունակներն են՝ 1328 մարդ: Դատապարտվածների թվում կա նաև 481 զինվորական, 48 պաշտոնատար անձ, 36 կալանավոր և այլն:

Նախորդ տարի դատապարտվածների մեծ մասը կատարել է սեփականության դեմ ուղղված հանցագործություններ(657), այնուհետև շատ են եղել զինվորական ծառայության կարգի դեմ ուղղված հանցագործությունները (375), շատ են եղել նաև բնակչության առողջության դեմ ուղղված հանցագործությունները (333):

Ընտանիքի և երեխայի շահերի դեմ ուղղված հանցագործությունների համար նախորդ տարի դատապարտվածների թիվը կազմել է 4, որից մեկ դեպքը կատարվել է 18–29 տարեկան, իսկ մյուս երեքը՝ 30–49 տարեկան անձանց կողմից:

14–17 տարեկան երեխաների կողմից կատարված հանցագործությունների մեծ մասը վերաբերում է սեփականության դեմ ուղղված հանցագործություններին են: Նախորդ տարի դատապարտված երեխաների կողմից կատարվել է կյանքի և առողջության դեմ ուղղված 12, հասարակական անվտանգության դեմ ուղղված 9, շրջակա միջավայրի անվտանգության դեմ ուղղված 1, կառավարման կարգի դեմ ուղղված և արդարադատության դեմ ուղղված 3 հանցագործություն:

Ըստ հետազոտության դատապարտվածներից 33–ի դեպքում հանցագործությունը կատարվել է ալկոհոլի, թմրամիջոցի կամ թմրեցնող այլ նյութերի ազդեցության տակ: 2017 թ. դատապարտվածների թվում եղել է 48 օտարերկրացի և 4 քաղաքացիություն չունեցող անձ:

Նախորդ տարի կիրառված պատժատեսակների մեջ գերակշռում է տուգանքը, որը կիրառվել է 752 հոգու նկատմամբ, 181–ի նկատմամբ կիրառվել է կալանք, իսկ 14–ի նկատմամբ էլ՝ դաստիարակչական բնույթի հարկադրանքի միջոց:

Բացի այդ, 13 հոգու նկատմամբ կիրառվել է գույքի բռնագրավում, իսկ 122 նախկին պաշտոնյա զրկվել է որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից:

Դատապարտվածների ազատազրկման ժամկետները դիտելիս տեսնում ենք, որ նախորդ տարի միայն մեկ հոգու նկատմամբ է կիրառվել ցմահ ազատազրկում:

Շարունակությունը՝ «Փաստ» օրաթերթի այսօրվա համարում