2018թ. Երևանում նախատեսվում է ևս 6 խաչմերուկում տեղադրել ձայնային ազդանշանով լուսացույցներ. Ս. Մերթարջյան
ՀԱՍԱՐԱԿՈՒԹՅՈՒՆ
Երևանի քաղաքապետարանը կույր անձանց տեղաշարժման համար մայրաքաղաքում հարմարավետ պայմաններ է ստեղծում։
«Արմենպրես»-ի հետ զրույցում Երևանի քաղաքապետարանի աշխատակազմի քարտուղարի տեղակալ, հաշմանդամությունունեցողանձանցհիմնահարցերովզբաղվողԵրևանիքաղաքայինհանձնաժողովիանդամՍամվել Մերթարջյանն ասաց, որ տեսողության խնդիր ունեցող անձանց դրսում տեղաշարժվելու հարմարավետությունն ապահովելու համար տեղադրում են դեղին, հատուկ գոգավորության սալիկներ, փողոցներում կանաչ լույսի ազդանշաններ և այլն։
«Միջազգային չափորոշիչներին համապատասխան մայթերի վրա՝ փողոցին մոտ, կան դեղին հատուկ գոգավորության սալիկներ, որոնք ունեն նախազգուշացնող նշանակություն։ Այդ սալիկները զգուշացնում են անձին, որ մոտ 30-40 սմ հետո արգելք կա և պետք է ուշադիր լինել։ Այս գործընթացը սկսել ենք «Հայաստանի կույրերի միավորում» հասարակական կազմակերպության հետ, և շարունակական բնույթ է կրելու։ Աշխատանքներն իրականացվել են Կենտրոն, Արաբկիր, Նոր Նորք վարչական տարածքներում։ Մենք հատված-հատված, բայց հաստատուն քայլերով առաջ ենք շարժվում։ Ծրագիրը բավականին հաջող է, և գուցե հենց վաղը մենք կարողանանք ասել, որ հասել ենք այն ցուցանիշին, որ փողոցային տեղաշարժման համար խոչընդոտներ այլևս չունենք։ Սա մշակույթ է, որ ազդում է բոլորի վրա, և հասարակությունը որևէ գործունեություն ձեռնարկելիս սկսում է հաշվի առնել նաև հաշմանդամություն ունեցող անձանց տեղաշարժման հարցը»,- ընդգծեց Մերթարջյանը:
Նախազգուշացնող սալիկների տեղադրումից բացի, քաղաքապետարանը նաև պատրաստվում է ուղղորդող սալիկներ տեղադրել, և փորձում են ձեռք բերել անհրաժեշտ գույքը, որպեսզի ապահովեն կույր անձանց հանգիստ տեղաշարժը քաղաքում։
«Շինարարական աշխատանքների մեջ նաև այլ ուղղություններ ունենք՝ անցյալ տարի 37 համարի ավտոբուսում տեղադրեցինք ձայնագրություններ, որոնք ազդարարում են հաջորդ կանգառի մասին։ Դրանից առաջ ևս 37-ն ենք ունեցել, և, բնականաբար, շարունակական կլինի այս ծրագիրը, և այս համակարգը կգործի բոլոր ավտոբուսներում։ Դա արվում է տեսողության խնդիրներ ունեցող անձանց համար։ Այս պահին քննարկման ընթացքում է մեր ընդհանուր տրանսպորտային խնդրի լուծումը, որտեղ նաև կա քաղաքապետի խիստ հանձնարարական։ Այսօր արդեն ունենք 25 ավտոբուս, որոնք հարմարեցված են վերելակներով և պետք է այնպես անենք, որպեսզի յուրաքանչյուր ավտոբուս հարմարեցված լինի։ Սա կհանգեցնի խնդրի 100-տոկոսանոց լուծմանը։ Այստեղ նույնպես մենք իրականացնում ենք մեծ և շարունակական աշխատանք հասարակական կազմակերպությունների հետ»,- նշեց Երևանի քաղաքապետարանի աշխատակազմի քարտուղարի տեղակալը։
Երևանի քաղաքապետարանը համագործակցում է նաև պետավտոտեսչության հետ՝ շարունակելով փողոցներում կանաչ լույսի ազդանշաններ տեղադրելու աշխատանքները։ Սամվել Մերթարջյանը հայտնեց, որ բնակիչները երբեմն իրենց մտահոգությունն են արտահայտում ազդանշանի բարձր լինելու հետ կապված, սակայն քաղաքապետարանի աշխատակիցներն ու պետավտոտեսուչներն արագ փորձում են լուծում գտնել և ավելի մեղմացնել ձայնը։
«Մեր աշխատանքները կավարտվեն այն ժամանակ, երբ յուրաքանչյուր հատված կունենա համապատասխան սարքավորում։ 2018 թվականին մայրաքաղաքում նախատեսվում է ևս 6 խաչմերուկում տեղադրել ձայնային ազդանշանով լուսացույցներ»,- եզրափակեց նա։
Մերթարջյանը հասարակական կազմակերպությունների հետ համագործակցության գրավական է համարում այն, որ իրենք աշխատում են կոնկրետ շահառուների շահերի, այլ ոչ թե ցուցանիշներ գրանցելու համար։ Նրա հավաստմամբ, դա համագործակցության ամենաուժեղ գրավականն է, որովհետև իրենք բավականին մեծ ճանապարհ են անցել այդ կազմակերպությունների վստահությունը ձեռք բերելու համար։
