«Բաց տեսարաններում նկարահանվելուն վերաբերվում եմ այնպես, ինչպես իր գործը սիրող ու գնահատող մասնագետը» Էվա Խաչատրյան

Դերասանուհի Էվա Խաչատրյանին  ներկայումս  հեռուստադիտողը  տեսնում է  «ATV»  հեռուստատեսությամբ ցուցադրվող «Կայարան»  հեռուստասերիալում և «Կամերային թատրոնում»: ShowBiz.am-ը դերասանուհու հետ զրուցել է  իր առաջին ներկայացումների հիշողությունների, բաց տեսարաններում նկարահանվելու համարձակության, այսօրվա սերիալների հանդեպ իր դժգոհության և առաջիկա ծրագրերի մասին:

Ավելի մանրամասն ՝ այստեղ

Դերասանուհին այսօրվա նման է հիշում  իր առաջին քայլերն այս ասպարեզում: Ամեն ինչ սկսսվել է դեռ ուսանողական տարիներից. «Առաջին նախագիծնը եղել է «Պահանջվում է գումար»  նովելների շարքը, որտեղ տարբեր կերպարներ էի մարմնավորում»,- հիշեց Էվան և հավելեց, որ դժվարություններ նույնպես ունեցել է. «Կարիերայիս սկիզբը, բնականաբար, ուղեկցվել է բազմաթիվ դժվարություններով և խոչընդոտներով, թեև ես միշտ ուրախ էի իմ աշխատանքով»: Երբ խոսքը վերաբերում է թատրոնին, Էվան իր ոգևորությունը թաքցնել չի կարողանում. «Թատրոնն իմ սերն է, կյանքիս շարժիչ ուժն ու տարերքը, իմ տունն է: Այն նաև իմ ցավն ու ապրումներն է, որպես դերասան՝ բավարարված լինելուս պատճառը»,-ասաց դերասանուհին և հավելեց, որ իր դերերի գունապնակը շատ լինելու ցանկությունն անսպառ է՝ մշտապես տարբերվել կարողանալու համար:

Էվային հավասարապես  հոգեհարազատ են թե՛ թատրոնը և թե՛ սերիալները. «Դրանք միաժամանակ և՛ նման են իրար, և՛ տարբեր: Երկուսում էլ զգում եմ ինձ լիարժեք»,-ասում է դերասանուհին: Իսկ հարցին՝ արդյոք գոհացնում են դերասանուհուն էկրաններին հայտված մերօրյա հեռուստասերիալները, պատասխանում է՝ ցավոք, ո՛չ. «Շատ կուզեի զգալի որակային փոփոխություններ տեսնել և՛ սցենարային առումով, և՛ նկարահանման որակի»: Դերասանուհու խոսքով՝  իրեն հատկապես  նյարդայնացնում են սցենարների միօրինակությունը, չափից շատ լացն ու տխրությունը, անորակ նկարահանումները, ոչ պրոֆեսիոնալ ռեժիսորական տեսիլները.  «Շատ-շատ են բացասական կողմերը, բայց, հույս ունենամ, որ այս ամենը ժամանակի ընթացքում կունենա իր աճն ու զարգացումը»,-ասում է նա:

Դերասանուհին ունի իր հստակ պահանջմունքները դերերի հետ կապված, որոնց բացակայության դեպքում պատրաստ է հրաժարվել առաջարկներից. «Նյութը պետք է գրավի ինձ, ունենա նպատակ ու իմաստ, կերպարը ասելիք պետք է ունենա և հետաքրքիր լինի, առաջացնի ստեղծագործելու ցանկություն: Եթե այս ամենը բացակայի, ես կհրաժարվեմ յուրաքանչյուր առաջարկից»:

Էվայի հետ խոսեցինք բաց տեսարաններում նկարահանվելու իր համարձակության, հանդիսատեսի կարծիքների ու  քննադատությունների մասին: Դերասանուհու խոսքով՝ ինքն անձամբ շատ մասնագիտորեն է մոտենում բաց տեսարաններում նկարահանվելուն. «Բաց տեսարաններում նկարահանվելուն վերաբերվում եմ այնպես, ինչպես իր գործը սիրող ու գնահատող մասնագետը»: Դերասանուհին վստահ է, որ դա սովորական ստեղծագործական պրոցես է և ոչնչով իրականում չի տարբերվում այլ տեսարաններից: Իսկ վատ մեկնաբանություններ անողների մասին դերասանուհին ունի իր ուրույն կարծիքը. «Մտածում եմ՝ ինչ ափսոս, որ հասարակության մեծամասնությունը տգետ է»:

Վերջում՝ դերասանուհին հավելեց, որ մոտ ապագայում շատ ծրագրեր ու նոր առաջարկներ ունի, որոնցից բարձրաձայնել ցանկացավ միայն մեկի մասին. «Շուտով, «Կամերային թատրոն»-ում  սպասվում է մի հրաշալի ներկայացման պրեմիերա, որը կոչվում է «Սև արկղ»,- եզրափակեց Էվան