Ամեն ինչ անելու ենք, որ Հրազդանում ընտրությունները լինեն բաց, թափանցիկ. Է. Շարմազանով

ԱԺ փոխնախագահ, ՀՀԿ մամուլի խոսնակ Էդուարդ Շարմազանովը կարծում է, որ ապրիլի 17-ին Հրազդանում սպասվող քաղաքապետի ընտրությունների առնչությամբ տեղի ունեցած զարգացումներից հետո ՀՀԿ-ի եւ «Քաղաքացիական պայմանագրի» թեկնածուների շտաբերի ներկայացուցիչները դիմել են իրավապահներին եւ քաղաքական շեշտադրում չի ցանկանում տալ: Այս մասին Էդուարդ Շարմազանովն ասաց այսօր ՀՀԿ ԳՄ նիստից հետո լրագրողների հետ հանդիպմանը:

Armtimes.com-ի հարցին՝ որքանո՞վ եք նորմալ համարում Հրազդանում ՀՀԿ-ի քաղաքապետի թեկնածու Արամ Դանիելյանի շտաբի հայտարարությունը, ԱԺ պատգամավոր Նիկոլ Փաշինյանին գաղտնի նկարահանելու երեւույթը, Էդուարդ Շարմազանովը պատասխանեց. «Մի գործընթաց, որն այլեւս գտնվում է իրավական տիրույթում մեկնաբանելու կարիք չկա իմ կողմից, որովհետեւ մենք գիտենք թե՛ պարոն Փաշինայնը, եւ թե՛ պարոն Դանիելյանը դիմել են կամ գոնե նրանց վստահված անինք դիմել են համապատասխան իրավապահ մարմիններին եւ իմ գործունեության պրակտիկայում չկա նման դեպք, որ ես իրավական տիրույթում գտնվող խնդիրներին որեւէ քաղաքական շեշտադրումներով գնահատակ տամ: Ես ձեռնպահ կմնամ:

Ամեն դեպքում Հրազդանում, Սպիտակում էլ կան ընտրություններ, մենք ամեն ինչ անելու ենք, շահագրգռված ենք նախ եւ առաջ, որ ընտրությունները լինեն բաց, թափանցիկ, ժողովրդավարական, ազատ ու մրցակցային: Սա մեզ համար շատ կարեւոր է եւ մեզ համար կարեւոր է, որպեսզի ընտրությունների որակն այդ ՏԻՄ ընտրությունների ընթացքում լինեն բարձեր»:

Անդրադառնալով նախկին արտգործնախարար Վարդան Օսկանյանի այն հայտարարությանը, որ նոր կուսակցություն ստեղծելով ինքը փորձելու է մտքի հեղափոխություն իրականացնի, Էդուարդ Շարմազանովն ասաց. «Չեմ կարծում, որ մենք ԳՄ նիստից հետո պետք է քննարկենք հերթական ընդդիմադիր գործչի մտքերը: Մտքեր են, կարող է քամու տատանումներ լինեն, ես չեմ պատրաստվում ամեն մի տատանման մասին այսօր այստեղ գնահատական տալ: Իր իրավունքն է: Չեմ մեկնաբանում, ավելի լուրջ հարցեր կան մեկնաբանելու»: