Հիվանդանոցից հայտնում են, որ ոստիկանների հետ բախման ժամանակ վնասված կնոջ վիճակը նորմալ է

Գրիգոր Լուսավորիչ հիվանդանոցից, ուր տեղափոխվել էր այսօր Մաշտոցի պողոտայում տեղի ունեցած բախման հետեւանքով վնասվածք ստացած Ռուզաննա Եղնուկյանը, մեզ տեղեկացրին, որ կնոջ վիճակը նորմալ է:

Հիվանդանոցի բուժական գծով փոխտնօրեն Ռոբերտ Օրդուսյանը քիչ առաջ մեր թղթակցին փոխանցեց, որ Ռուզաննա Եղնուկյաը ենթարկվել է հետազոտության, որեւէ լուրջ վնասվածք չունի, միայն գլխի վրա՝ ճակատի շրջանում բաց վերք կա:

Մեր հարցին՝ վերքը կարվե՞լ է, Օրդուսյանը բացասական պատասխան է տվել:

Հիշեցնեք, այսօր Մաշտոցի պողոտայում բախում էր տեղի ունեցել ոստիկանների եւ «Նոր Հայաստան» շարժման անդամների միջեւ, որի հետեւանքով շարժման անդամներից Կարո Եղնուկյանի կինը՝ Ռուզաննա Եղնուկյանը գլխի շրջանում վնասվածք էր ստացել եւ շտապօգնության մեքենայով հիվանդանոց տեղափոխվել:

Թե ով վնասեց կնոջը՝ այս պահին դեռեւս պարզ չէ: Շուրջ 10 րոպե նա արնահոսող գլխով պառկած էր ասֆալտին: Հայտնի է, որ «Նոր Հայաստանի» անդամների ակցիայի պահանջը Գեւորգ Սաֆարյանի ազատությունն է: Ակցիայի մասնակիցները մեխով շղթաներ էին ամրացրել գետնին եւ իրենց շղթայել էին գետնին:

Ականատես կանանցից մեկը պնդում էր, որ Ռուզաննա Եղնուկյանին վնասել է ոստիկանը՝ ոտքով հարվածելով:

«...երբ որ կինը նստած է ու համոզում է թեկուզ այդ տղամարդկանց, որ վեր կենան, ինքը ոտքով, քացով խփում է պառկած կնոջը եւ ճակատը բաց է անում»,- պատմում էր կինը:

Լրագրողի ճշտող հարցին՝ ոստիկա՞նն է վնասել Ռուզաննա Եղնուկյանին՝ կինը պատասխանում է. «Այո, մենք պարոն Օսիպյանին (Երեւանի փոխոստիկանապետ Վալերի Օսիպյան-խմբ.) հենց նոր ցույց տվեցինք, թե դա որ ոստիկանն էր»,- ասաց նա:

Ի տարբերություն ակցիայի մասնակիցների՝ Վալերի Օսիպյանը պնդում էր, որ Ռուզաննա Եղնուկյանը վնասվել է ակցիայի մասնակիցների հրմշտոցի հետեւանքով։ «Նրանք իրենց ամրացված շղթաները մեխերով ամրացրել են ասֆալտին, երբ ոստիկանները փորձել են ազատել փողոցը, ակցիայի մասնակիցները, հրելով մեկը մյուսին, այդ վնասվածքը ստացել են»,- ասում էր Օսիպյանը:

Հիշեցնենք, ակցիայի ընթացքում տասնյակ ակտիվիստներ էին բերման ենթարկվել ոստիկանություն, այդ թվում՝ «Նոր Հայաստանի» անդամներ Կարո Եղնուկյանը, Սյուզի Գեւորգյանը, Գագիկ Եղիազարյանը, Հովհաննես Ղազարյանը:

Ըստ ոստիկանության լրատվական ծառայության փոխանցած տեղեկությունների, բերման ենթարկվածները 14-ն են: Նրանց մի մասն արդեն ազատ են արձակվել:

Լուսանկարներն՝ այստեղ