«Սասնա ծռեր»-ը ոչ միայն սննդի խնդիր ունի, արդեն նաեւ՝ բուժօգնության

Արդեն չորրորդ օրն է, ինչ ոստիկանության Էրեբունու պարեկապահակային ծառայությունը գտնվում է «Սասնա ծռեր» խմբավորման հսկողության ներքո:

Հիշեցնենք, որ երեկ գիշերը բախում տեղի ունեցավ ցուցարարների ու ոստիկանների միջեւ, որի հետեւանքով 50-ից ավելի ցուցարարներ տեղափոխվեցին հիվանդանոց, իսկ արդեն առավոտյան ոստիկանները ցրեցին ցույցը՝ բերման ենթարկելով տասնյակ քաղաքացիների:

Armtimes.com-ի հարցին, թե Էրեբունու ՊՊԾ-ի տարածքում գիշերն ինչպե՞ս է եղել, «Սասնա ծռեր» խմբի անդամ Պավլիկ Մանուկյանը պատասխանեց՝ գերազանց:

Մանուկյանը վստահեցրեց, որ գիշերն որեւէ բախում չի եղել իրենց ու ոստիկանների միջեւ:

Հետաքրքրվեցինք թե ինչպես են իրենց զգում պատանդները, Մանուկյանը պատասխանեց.

«Համենայն դեպքում՝ ինձնից կայտառ»:

Հարցին՝ տեղյա՞կ եք գիշերվա իրադարձություններից, Մանուկյանը նկատեց, որ այնքանով, որքանով հնարավոր է, տեղյակ է:

Նկատենք, որ բախումից առաջ ցուցարարները խմբին սննդի փոխանցման խնդիրն էին կրկին բարձրացնում, ինչն էլ լարված մթնոլորտ առաջացրեց:

Հետաքրքրվեցինք, արդյո՞ք որեւէ կերպ լուծվել է սննդի հարցը, Մանուկյանը նկատեց, որ սննդի խնդիր կա:

Դիտարկմանը, որ երեկ ԱԺ պատգամավոր Նիկոլ Փաշինյանի հետ զրույցում Երեւանի ոստիկանապետ Աշոտ Կարապետյանը հայտնել էր, որ խումբը կարողացել է իր միջոցներով սնունդ գտնել, Մանուկյանը զարմացավ.

«Էդ մեր միջոցներով ո՞նց էինք սնունդ գտնելու, ձե՞ռ եք առնում: Էսօր էլ բժիշկներին հանեցին, առաջին բուժօգնություն մենք էլ չենք ունենալու, մեքենան մնաց բժիշկները գնացին»,-ասաց նա:

Մեր հարցին՝ որեւէ հիմնավորում չասեցի՞ն, թե ինչու են գնում, Մանուկյանը կատակեց.

«Ասեցին՝ մեզ չեն սիրում»:

Նկատենք, որ նախկինում Շտապօգնության հերթափոխի ժամանակ նոր խումբը փոխարինում էր տարածքում գտնվող խմբին: