Տարածքները հանձնվելու են ոչ թե ստորագրությամբ, այլ պատերազմի միջոցով. Հայկ Մարտիրոսյան
ՊԱՏՄՈՒԹՅԱՆ ԱՅՍ ՕՐԸ
Որեւէ մեկը թող չակնկալի, որ տարածքները հանձնվելու են ստորագրությամբ, կարող են հանձնվել պատերազմի ընթացքում։ Այս մասին այսօր ԼՂՀ հակամարտության վերաբերյալ Արցախում հրավիրված քննարկման ժամանակ հայտարարել է քաղաքագետ Հայկ Մարտիրոսյանը։
«Վերջին շրջանում տեսնում եմ, որ Հայաստանի Հանրապետության տարածքում օդում դավաճանության ուրվականն է շրջում։ Առանձին պատգամավորներ սկսել են խոսել Արցախի անկախության ճանաչման դիմաց տարածքները հանձնելու մասին։ Իսկ ինչու է մեզ պետք, որ Ադրբեջանը ճանաչի Արցախի անկախությունը, բոլորովին պետք չի։ Արցախը ազատագրված տարածք է, Արցախը պատմական Հայաստանն է եւ պիտի միացվի Հայաստանին, ի՞նչ է, մենք թշնամուց, որին հաղթել ենք, աղերսում ենք, որ ճանաչի՞ մեր հաղթանակը, եւ դրա համար պատրաստ ենք պարտվե՞լ, մեր հաղթանակի երաշխիքը, որը հողն է, վերադարձնե՞լ»,-ասել է Հայկ Մարտիրոսյանը։
Վերջինս նշել է, որ որեւէ մեկը թող չակնկալի, որ տարածքները հանձնելը կլինի ստորագրությամբ, որին դեմ լինեն կամ ոչ, այլ պատերազմի ժամանակ։
«Որեւէ մեկը թող ակնկալիք չունենա, որ տարածքները հանձնվելու են ստորագրությամբ։ էսպիսի վարկած կա, որին կարելի է հավատալ, կարելի է չհավատալ, որ ազատագրված տարածքները կարող են հանձնվել առաջիկա պատերազմի ընթացքում, իսկ այն որ պատերազմ լինելու է, դա անկասկած է։ Քանի որ հռչակվել է, որ զինվորի կյանքը ամենամեծ սրբությունն է հողից առավել սրբություն, բացառված չէ, որ այս մտայնությունը, որ այսօր քարոզվում է, դառնա գերիշխող, պատերազմի ժամանակ որոշ անձանց կամ գործիչների կողմից հայտարարվի, որ հսկայական կորուստներ են լինում, տարածքները պետք է հանձնենք կամ չկարողացանք պահել հսկայական կորուստներ ունեցանք։ Սա է հիմնական խնդիրը, որի շուրջ պետք է կենտրոնանանք, դավաճանությունը պոզով-պոչով չի լինում»,-ասել է քաղաքագետը։
Վերջինս շեշտել է, որ այժմ բանակցությունների սեղանին դրված է ավելի վատ փաստաթուղթ, քան կազանյանն էր։
«Կազանյան փաստաթղթին էր սովորաբար հղում արվում ու ասվում՝ ձեւական փաստաթուղթ էր եւ մենք իրականում տարածքներ չենք հանձնելու։ Այսօր ունենք առավել վատ փաստաթուղթ սեղանին, որը նոր տարբերակն է եւ դրա շուրջ ընթանում են բանակցություններ»։
