Նեթանյահուի կուսակցությունը պահպանում է առաջատարությունը ընտրություններում քվեաթերթիկների 84,5 տոկոսի հաշվարկից հետո
ՄԻՋԱԶԳԱՅԻՆ
Իսրայելի վարչապետ Բենիամին Նեթանյահուի գլխավորած «Լիկուդ» կուսակցությունը նախկինի պես առաջատար է հոկտեմբերի 27-ին երկրում կայացած խորհրդարանական ընտրություններում քվեաթերթիկների 84,5%-ի հաշվարկից հետո: Այս մասին են վկայում Կենտրոնական ընտրական հանձնաժողովի (ԿԸՀ) հրապարակած նախնական տվյալները, հայտնում է ՏԱՍՍ-ը:
ԿԸՀ տվյալների բազայի վերջին թարմացումը կատարվել է տեղական ժամանակով կեսօրից հետո՝ 12:34-ին (Երևանի ժամանակով 14:34-ին): Ներկայացված տեղեկատվության համաձայն՝ Նեթանյահուի կուսակցությունը ստանում է 27 մանդատ 120-տեղանոց խորհրդարանում, իսկ ընդդիմությունից նրա գլխավոր մրցակից Գադի Այզենկոտը «Յաշար» կուսակցությամբ զբաղեցնում է երկրորդ հորիզոնականը՝ ստանալով 22 տեղ:
Ընդ որում, պահպանվում է նաև ծայրահեղ աջ և օրթոդոքս ուժերի մասնակցությամբ Նեթանյահուի կուսակցությունների ամբողջ բլոկի ընդհանուր առաջատարությունը, որոնք կազմում են նաև գործող իշխող կոալիցիան: Այս պահին այդ բլոկը վերահսկում է 54 աթոռ 120-ից, իսկ ընդդիմությունն առայժմ ստանում է 49 տեղ: Եվս 17 մանդատ ստանում են արաբական կուսակցությունները, որոնց հետ, ըստ կանխատեսումների, կոալիցիա կազմելու պատրաստ չեն ո՛չ ընդդիմությունը, ո՛չ «Լիկուդը»: Իշխող մեծամասնություն ձևավորելու համար անհրաժեշտ է Քնեսեթում (խորհրդարան) 61 տեղ վերահսկող կոալիցիա, որն առայժմ չի ստանում ոչ մի քաղաքական ուժ:
Ինչպես սպասվում է, ԿԸՀ-ն բոլոր քվեների հաշվարկի արդյունքների մասին կհայտնի հոկտեմբերի 29-ին, իսկ ընտրական ընթացակարգի վերջնական պաշտոնական ամփոփումները պետք է հրապարակվեն ոչ ուշ, քան նոյեմբերի 4-ը: Այդ արդյունքները ստանալուց հետո երկրի նախագահ Իսահակ Հերցոգը կսկսի խորհրդակցությունները Քնեսեթ անցած կուսակցությունների ներկայացուցիչների հետ, որոնց արդյունքներով պատգամավորներից մեկին կհանձնարարի ձևավորել նոր կառավարական կոալիցիա:
Վարչապետի թեկնածու, որպես կանոն, դառնում է պատգամավորական ամենաշատ մանդատներ ունեցող կուսակցության առաջնորդը, սակայն կաբինետի ձևավորումը նախագահը կարող է հանձնարարել նաև այն քաղաքական գործչին, ում կուսակցությունը չի ստացել ամենաշատ ձայները, բայց ի վիճակի է ստեղծել կոալիցիա: Վարչապետի առաջին հավակնորդին կտրամադրվի 28 օր կառավարություն ձևավորելու համար՝ այդ ժամկետը երկու շաբաթով երկարաձգելու հնարավորությամբ: Անհաջողության դեպքում նախագահն այդ իրավունքը կփոխանցի մեկ այլ պատգամավորի, ում խնդրի լուծման համար կհատկացվի երկու շաբաթ՝ առանց երկարաձգման հնարավորության: Եթե այդ դեպքում ևս 61 պատգամավորական մանդատ վերահսկող կոալիցիայի ձևավորում տեղի չունենա, ապա 90 օր անց նշանակվելու են նոր ընտրություններ:
