Իմ հավանած աղջկա հետեւից սուլեց. պատմում է համակարգից հեռացված ոստիկանի հետ վիճած վարորդը

Ոստիկանության համակարգից հեռացված ոստիկան Արտյոմ Ռուստամյանի եւ 14 համարի երթուղայինի վարորդի վեճի պատճառը ոստիկանի վատ պահվածքն է եղել վարորդի հավանած աղջկա նկատմամբ: Այս մասին NEWS.am-ին պատմեց վարորդը՝ Արթուր Ղարիբյան:

«Էդ աղջիկը իմ հաճախորդն է, իմ տրանսպորտից է միշտ օգտվում ու իմ հավանած աղջիկն է: Ամեն օր իրան «Ռոսիա» եմ իջացնում: Էդ օրն էլ, երբ բերեցի իջացնեմ, իջավ, ոստիկանը երկար նայում էր, աղջիկը անցավ, մի 20 մետր հեռացավ մեքենայից, պետք է գետնանցումով իջներ, ոստիկանը սուլեց նրա հետեւից 6-ից 7 անգամ»,- պատմեց վարորդը:

Արթուր Ղարիբյանի խոսքով՝ ինքը դրանից հետո կանչել է ոստիկանին, նա մոտեցել է իր պատուհանին եւ վիճաբանել են:

«Ասեցի՝ ճանաչո՞ւմ ես այդ աղջկան, ասեց՝ չէ, ի՞նչ կա որ: Ասեցի՝ եթե չես ճանաչում ու նման բան ես թույլ տալիս, հեսա իջա, ղեկով գլուխդ կջարդեմ: Այդ «ղեկով գլուխդ ջարդելու» համար ինքը ձեռքը երկարարացրեց, ինձ հարվածեց»,- պատմեց նա՝ նշելով որ հարվածից իր ակնոցը վնասվել է:

Արթուր Ղարիբյանը հրաժարվել է հաղորդում տալ ոստիկանի դեմ:

«Ոստիկանություն տարան, ես ասեցի, որ չեմ բողոքում, բողոքում եմ, որ անծանոթ աղջկա հետեւից ոստիկանը սուլում է»,- նշեց նա:

Ավելի վաղ NEWS.am-ը հայտնել էր, որ ոստիկանության համակարգից հեռացվել է Երեւան քաղաքի վարչության պարեկապահակետային ծառայության գնդի 1-ին վաշտի ոստիկան, ոստիկանության սերժանտ Արտյոմ Ռուստամյանը: Ոստիկանության լրատվական ծառայության հաղորդագրության համաձայն՝ Արտյոմ Ռուստամյանը հուլիսի 6-ին՝ ժամը 12.45-ի սահմանում, Տիգրան Մեծի պողոտայի Գրիգոր Լուսավորիչ եկեղեցու դիմացի կանգառում ծառայություն իրականացնելիս վիճաբանել է թիվ 14 երթուղու վարորդ Արթուր Ղ.-ի հետ, հրել նրան, հարվածել դեմքին: