Ինչպե՞ս է ադրբեջանցի զինծառայողի կրակոցից տուժած կինը․ ի՞նչ է հայտնի

Սեպտեմբերի 29-ին Ադրբեջանի Պետական անվտանգության ծառայությունը Հայաստանի ԱԱԾ-ին տեղեկացրել էր, որ Ադրբեջանի զորամասերից մեկի զինծառայողը անհայտ հանգամանքներում լքել է ծառայության վայրը։ Չի բացառվել, որ նա կարող էր ապօրինի հատած լինել Հայաստանի սահմանը։

Հոկտեմբերի 1-ին՝ ժամը 14։15-ին, ՀՀ ՆԳՆ 112 օպերատիվ կառավարման կենտրոն ահազանգ է ստացվել, որ Սյունիքի մարզի Շաքի բնակավայրում կրակել են ՀՀ քաղաքացու ոտքին։ Պարզվել է, որ հանցագործությունը կատարել է ադրբեջանցի զինծառայողը, որը ձերբակալվել է։ Դեպքի մանրամասները ներկայացվել են նաև ադրբեջանական կողմին։

Դեպքի առնչությամբ ՀՀ քննչական կոմիտեում նախաձեռնվել է քրեական վարույթ։

Բնակիչների պատմելով՝ ադրբեջանցի զինծառայողը գիշերն անցկացրել է Շաքիի բնակչի տանը՝ օգտվելով տանտերերի բացակայությունից։

«Կինն ու երեք երեխաները տանը չեն գիշերել։ Դպրոցից հետո կինը երեխաների հետ տուն է վերադարձել, տեսել ադրբեջանցուն, աղմուկ է բարձրացրել, ադրբեջանցին կրակել է կնոջ վրա»,- պատմել է բնակիչը։

Գյուղացիների խոսքով՝ կինը կարողացել է ինքնապաշտպանության դիմել և դանակով հարվածել ադրբեջանցուն։ Վերջինս փախել և թաքնվել է անասնագոմում, որտեղ էլ հայտնաբերել են նրան։

Շաքիում ադրբեջանցու կրակոցից վնասվածք ստացած կնոջ երկու երեխաները ևս դիմել են բուժօգնության։ Այս մասին երեկ հայտնել էին Դատախազությունից։

«Սիսիանի բժշկական կենտրոնից ահազանգ է ստացվել, որ մարմնական վնասվածքներով բուժօգնության են դիմել վիրավորում ստացած ՀՀ քաղաքացու՝ 2011 և 2014 թվականներին ծնված երեխաները։ 2014 թվականին ծնված երեխայի մոտ առկա է եղել փափուկ հյուսվածքների սալջարդ, իսկ 2011 թվականին ծնված երեխայի մոտ՝ աջ դաստակի կոտրվածք»,- հայտնել էր Դատախազությունը։

Գերատեսչության հաղորդագրության համաձայն՝ ադրբեջանցի զինծառայողի կրակոցի հետևանքով վնասվածքներ ստացած Անի Ավետիսյանը 39 տարեկան է։

Հայաստան ապօրինի մուտք գործած ադրբեջանցին ժամկետային զինծառայող Նասիմ Մուսաևն է։ Նա ծառայել է Լաչինի՝ Բերձորի շրջանում տեղակայված զորամասերից մեկում։ Ադրբեջանի դատախազության փոխանցմամբ՝ Մուսաևը սեպտեմբերի 26-ին ինքնակամ լքել էր զորամասը։

ՀՀ իրավապահ մարմինները նրան ձերբակալել են։

Ադրբեջանցու հարձակումից վիրավորված սյունեցի կնոջը տեղափոխել են Երևան։ Այս մասին MediaHub-ին հայտնում են Առողջապահության նախարարությունից։ «Տուժածի առողջական վիճակը կայուն է, հեմոդինամիկան կայուն է։ Երեկ տեղափոխվել է երևանյան բուժկենտրոն, ստանում է համարժեք բուժօգնություն, վնասվածքների հետ կապված՝ էտապային բուժման փուլում է»,- MediaHub-ին ասաց Առողջապահության նախարարի մամուլի քարտուղար Մարիամ Ծատրյանը։

«Երեկվա դեպքից տուժած կնոջ առողջական վիճակը կայուն է, ստանում է անհրաժեշտ և վիճակին համարժեք բուժօգնություն. կյանքին սպառնացող վտանգ չունենք: Երեխաների առողջական վիճակը գնահատվում է բավարար: Ստացել են անհրաժեշտ հոգեբանական և բժշկական օգնություն»,- գրել է ԱՆ նախարար Անահիտ Ավանեսյանը: