Ռուսաստանը պատրաստ է վերանայել հայկական մրգերի և բանջարեղենի սահմանափակումները. «Ռուսաստանին կարելի է անտեսել. նա միևնույն է կհրաժարվի ամեն ինչից»

Ռուսաստան մատակարարվող հայկական ապրանքների հետ կապված գործը կրկին առաջնային պլան է մղել Մոսկվայի և Երևանի հարաբերությունները, գրում է 19rusinfo.ru–ն: Ռոսսելխոզնադզորը (Անասնաբուժական և բուսասանիտարական հսկողության դաշնային ծառայությունը) թույլատրել է վերանայել արգելքը, բայց հայկական կողմի համար սահմանել է կոնկրետ պայմաններ. Երևանը պետք է տրամադրի իր հետաքննությունների արդյունքները, անցկացված ստուգումների մասին զեկույցները և տա Եվրասիական տնտեսական միության սանիտարական պահանջներին համապատասխանության երաշխիքներ։

Մինչև անհրաժեշտ փաստաթղթերի առկայությունը, ռուսական շուկան մնում է փակ համապատասխան ապրանքների համար: Քաղաքագետ և Տարածաշրջանային խնդիրների ինստիտուտի գլխավոր տնօրեն Դմիտրի Ժուրավլևն է մեկնաբանել այս ամենը: հ

«Կարծում եմ, որ Ռուսաստանը ոչ թե զիջումներ է անում Երևանին, այլ ավելի շուտ սրում է հարաբերությունները Բաքվի հետ։ Կարծում եմ, որ այստեղ է թաղված շան գլուխը։ Մենք հանկարծ հիշեցինք Երևանի մասին հենց այն պահին, երբ Բաքվի հետ հարաբերությունները վատթարացան։ Ես չեմ կարող պնդել, որ այստեղ կա պատճառահետևանքային կապ, բայց նաև չեմ կարող ավտոմատ կերպով ասել, որ չկա», - նշել է Ժուրավլյովը։

Միևնույն ժամանակ, փորձագետը կարծում է, որ այժմ շատ բան կախված է հենց Հայաստանից։ Երևանը պետք է որոշի, թե որքանո՞վ է Ռուսաստանի հետ տնտեսական համագործակցությունը մնում երկրի համար օգտակար և արդյո՞ք վարչապետ Նիկոլ Փաշինյանը պատրաստ է կատարել հայկական արտադրանքը ռուսական շուկա վերադարձնելու համար անհրաժեշտ պահանջները։ «Հայաստանի համար նյութական շահույթը գլխավորն է։ Երկիրը փոքր է և ոչ հարուստ։ Եվ արդյո՞ք նրանք ավելի շահավետ են համարում մեզ հետ համագործակցել գյուղատնտեսության ոլորտում, թե՞ բացահայտորեն ցույց տալ մեզ հետ համագործակցելու իրենց դժկամությունը և դրանով իսկ Ֆրանսիայից շոկոլադ ստանալ, չգիտեմ։ Պարոն Փաշինյանի որոշելիքն է, թե ինչպես է ինքը ուզում կառուցել իր քաղաքականությունն ու տնտեսությունը», - նշել է քաղաքագետը։

Ըստ Ժուրավլևի Երևանի համար մեկ այլ խնդիր է Մոսկվայի և եվրոպական երկրների տարբեր մոտեցումները։ Ռուսաստանը մնում է Հայաստանի կարևոր տնտեսական գործընկեր, մինչդեռ Եվրոպայի հետ հարաբերությունները պահանջում են փոխգործակցության այլ մոդել, քան ունի Երևանը։ Հենց այդ պատճառով էլ, կարծում է փորձագետը, Հայաստանի ղեկավարությունը կարող է հույսը դնել Մոսկվայի վրա, որը, ի վերջո, զիջումների կգնա։ «Ինձ թվում է, որ Փաշինյանը խորապես համոզված է, որ մենք ամեն դեպքում ամեն ինչ ավտոմատ կերպով կտանք, մինչդեռ Եվրոպան ստիպված կլինի աղաչել դրա համար։ Հետևաբար, Ռուսաստանին կարելի է անտեսել. նա ամեն դեպքում ամեն ինչ կտա։ Բայց մենք պետք է լրջորեն աշխատենք Եվրոպայի հետ։ Ճիշտ այնպե, ինչպես իրենք են աշխատում. «Նրանք պարզապես չեն հարգում մեզ»», - ասել է նա։

Այս դեպքում, Ռոսսելխոզնադզորի հետ կապված ներկայիս իրավիճակը կարող է Մոսկվայի համար ունենալ մեկ այլ նպատակ, այն է ցույց տալ, որ ավտոմատ զիջումների նախկին մոդելը այլևս չի գործում։ Եթե Ռուսաստանը պահանջում է փաստաթղթեր և երաշխիքներ Երևանից, ապա հարցի լուծումը ուղղակիորեն կախված է դառնում Հայաստանի իշխանությունների գործողություններից։

Քաղաքագետը խոստովանել է, որ հենց այդպես էլ պետք է դիտարկել ներկայիս իրավիճակը: «Հնարավոր է, որ Ռոսսելխոզնադզորի հետ կապված այս ամբողջ խնդիրը ստեղծվել է նրանց մեր նկատմամբ հարգանքը վերջապես վաստակելու համար։ Դե, կտեսնենք։ Մենք, ինչպես բարի հայրը և բարի մայրը, հազվադեպ ենք զսպում մեր զայրույթը։ Եվ նրանք դա հիանալի հասկանում են և օգտվում դրանից։ Եվ ինչպե՞ս կարելի է զայրանալ երեխայի վրա, այնպես չէ՞։ Նա լավն է, նա երեխա է», - ասել է նա։

Նյութը հրապարակման պատրաստեց Կամո Խաչիկյանը

www.1or.am