Օգոստոսի 1-ից հոսանքը կթանկանա. կառավարության կողմից սակագնի սուբսիդավորման ժամկետը լրանում է

Հայաստանի Կառավարությունը էլեկտրաէներգիայի սակագնի մասամբ սուբսիդավորումը շարունակելու վերաբերյալ նոր որոշում չի կայացրել:

NEWS.am-ի թղթակցի գրավոր հարցին ի պատասխան ՀՀ էներգետիկայի եւ բնական պաշարների նախարարության մամուլի ծառայությունից մասնավորապես հայտնել են. «Ի պատասխան Ձեր հարցադրմանն ու ի կատարումն ՀՀ վարչապետի 06.07.2016թ. N02/22/9770-16 հանձնարարականի՝ տեղեկացնում եմ, որ ՀՀ կառավարության 2015թ. օգոստոսի 31-ի «Էլեկտրական էներգիայի սակագների մեղմացման միջոցառման եւ ՀՀ կառավարության 2014թ. դեկտեմբերի 18-ի N1444-Ն որոշման մեջ լրացումներ կատարելու մասին» N1030-Ն որոշման համաձայն, սպառողների առանձին խմբերին օգտագործած էլեկտրաէներգիայի դիմաց սուբսիդիայի տրամադրումը նախատեսված է 2015թ. օգոստոսի 1-ից մինչեւ 2016թ. հուլիսի 31-ը ներառյալ ընկած ժամանակահատվածի համար: Սուբսիդավորումը շարունակելու վերաբերյալ ՀՀ կառավարությունը նոր որոշում չի կայացրել: Կայացնելու դեպքում այդ մասին պատշաճ կերպով կտեղեկացվի հանրությանը»:

Հիշեցնենք, որ ԿՀԾՀ-ն որոշել էր նվազեցնել էլեկտրաէներգիայի սակագինը: Սակայն իրականում ամսական մինչեւ 250 կվտ/ժամ էլեկտրաէներգիա օգտագործող բնակիչների համար սակագինը կբարձրանա, որովհետեւ մինչեւ օգոստոսի 1-ը ուժի մեջ է էլէներգիայի սակագնի սուբսիդավորման որոշումը, ըստ որի, կառավարությունն իր վրա էր վերցրել սակագնի 6,93 դրամով սուբսիդավորման բեռը: Այսինքն մինչեւ օգոստոսի 1-ը մինչեւ 250 կվտ/ժամ էլեկտրաէներգիա սպառողները վճարում էին մեկ կվտ/ժամի համար 41,85 դրամ, իսկ հիմա սակագնի «նվազումից» հետո ստիպված են լինելու վճարել 46,2 դրամ: Նրանց համար էլեկտրաէներգիայի սակագինը կաճի 4,35 դրամով:

Էլէներգիայի սակագինն, իրականում, օգոստոսի 1-ին 2,58 դրամով կնվազի այն սպառողների համար, որոնց ամսական ծախսը ավելի է 250 կվտ/ժամից: