Նոր գույն վանաձորյան իրականության մեջ. դռներն է բացել «Padval Art Studio»-ն. «Փաստ»

«Փաստ» օրաթերթը գրում է.

Վանաձորում՝ Տերյան 2 հասցեում, իր դռներն է բացել «Padval Art Studio»-ն, որի համահիմնադիրներն են «May-Dec» փրոդաքշնի հիմնադիր Ռաֆայել Ղազարյանը և նկարիչ Սամվել Զոհրաբյանը։ Ռաֆայելն ասում է՝ հիմնել են արվեստի կենտրոն, որը պատրաստում է դիմորդներին գեղարվեստի բուհեր ընդունվելու համար։ «Կատարում ենք նաև ֆոտո և վիդեո նկարահանումներ, կազմակերպում ցուցահանդեսներ և համերգներ։ Մեզ համար ամենակարևորն այն է, որ սա դառնա հանդիպումների վայր ճանապարհ անցած մարդկանց հետ, որոնք կկիսվեն իրենց փորձով երիտասարդների հետ»,«Փաստի» հետ զրույցում ասում է կենտրոնի համահիմնադիրը։

Նման վայր ստեղծելու միտքն առաջացել է նկարիչ Սամվել Զոհրաբյանի հետ պարբերական զրույցների ժամանակ։ «Նախորդ տարի սկսեցինք նախապատրաստական աշխատանքները, վերանորոգեցինք տարածքը և օրերս մտերմիկ միջոցառմամբ տրվեց կենտրոնի աշխատանքների մեկնարկը։ Այս ճանապարհին, իհարկե, ունեցել ենք նաև դժվարություններ։ Հիմնական բարդությունը ֆինանսական հարցերն էին, մեկ էլ Վանաձորի եղանակային պայմանները, որ չէինք կարողանում արագացնել վերանորոգման փուլը։ Այնպես որ, մեր հիմնական խնդիրները եղել են ֆինանսը և վանաձորյան եղանակը։ Բոլոր հարցերում մեզ աջակցել են մեր ընկերները, առանց իրենց օգնության այս գաղափարն իրականություն դարձնելը բավականին դժվար կլիներ, եթե ոչ անհնար»,-նկատում է Ռաֆայելը։

Հունիսի 27-ին «Padval Art Studio»-ում տեղի ունեցած ցուցահանդես-համերգով տրվել է կենտրոնի գործունեության պաշտոնական մեկնարկը։ Իրենց կատարումներով հանդես են եկել Ալեքս Հարությունյան և ընկերները, նրանց միացել են «Լավ էլի» խմբի նախկին վոկալիստ Ալ յոշա Ավետիսյանը և հարվածային գործիքների կատարող Դավիթ Գրիգորյանը։ Ռաֆայելը զրույցի ընթացքում նաև շնորհակալություններ է ուղղում Բագրատիոն Դարբինյանին, Կարեն Ադամյանին, Գոռ Բադյանին, Էդգար Սարգսյանին, դերասան Արա Սարգսյանին, Վանաձորի Հովհաննես Աբել յանի անվան թատրոնի ողջ անձնակազմին և իրենց բոլոր-բոլոր ընկերներին։ Ընդգծում է՝ առանց մարդկային պարզ աջակցության անհնար է որևէ գաղափար կյանքի կոչել։

Նախապատրաստական դասընթացների ժամանակ նկարիչ Սամվել Զոհրաբյանի օգնությամբ բուհերի դիմորդները կտիրապետեն գծանկարի, կոմպոզիցիայի և գունանկարի նրբություններին։ «Դասընթացներն, իհարկե, վճարովի են, բայց ունենք անհատական մոտեցում, օրինակ՝ սոցիալապես անապահով ընտանիքների երեխաների համար։ Մեր հիմնական ուղղությունը բուհեր ընդունվել ցանկացողների համար դասընթացների անցկացումն է։ Արդեն ունենք հաջողություններ այս առումով՝ բուհեր ընդունված ուսանողներ, անգամ անվճար հիմունքներով։ Մեր նպատակը ոչ միայն այն է, որ իրենք պարապմունքների մասնակցեն, այլ նաև շփվեն ճանաչված արվեստագետների հետ։ Ցանկանում ենք, որ կենտրոնն արվեստագետների և արվեստասերների հանդիպման վայր դառնա, յուրահատուկ գույն փոխանցի վանաձորյան իրականությանը, աշխուժացնի մարզի կյանքը։ Լոռիի տարբեր գյուղերի դպրոցների աշակերտները ևս կհյուրընկալվեն մեզ մոտ, հանդիպումներ, կինոդիտումներ և համերգներ ենք կազմակերպելու, բնականաբար, անվճար հիմունքներով։ Շեշտում ենք, որ սա արվում է կրտսեր սերնդի համար, բայց մեզ մոտ կայացած համերգը ցույց տվեց, որ մենք՝ մեծերս, երևի թե առավել կարիքն ունենք նման շփումների և հանդիպումների»։

Նշում է՝ շարունակելու են բարելավել իրենց կենտրոնի պայմանները։ «Նպատակներ ունենք, որոնք ցանկանում ենք իրականություն դարձնել, բայց, իհարկե, ամենակարևորը՝ պետք է անընդհատ զարգացնենք կենտրոնը»,-եզրափակում է Ռաֆայել Ղազարյանը։

ԼՈՒՍԻՆԵ ԱՌԱՔԵԼՅԱՆ 

Մանրամասները՝ «Փաստ» օրաթերթի այսօրվա համարում