Ռուսաստանը խստացնում է պատժամիջոցները Հայաստանի դեմ

Ռուսաստանը կարող է միակողմանիորեն կասեցնել կամ դադարեցնել Հայաստանի հետ գազի, նավթամթերքի և չմշակված ադամանդների անմաքս մատակարարումների մասին համաձայնագիրը, եթե Երևանը շարունակի ԵՄ-ի հետ մերձեցման քաղաքականությունը։ Այդ ուղերձը տեղ է գտել ՌԴ էներգետիկայի նախարար Սերգեյ Ցիվիլևի՝ ՀՀ ՏԿԵ նախարարին ուղղված նամակում։

Ըստ «Կոմերսանտի»՝ Մոսկվայում կարծում են, որ Հայաստանի եվրոպական ինտեգրման շարունակական քայլերը վտանգում են երկկողմ առևտրատնտեսական և ներդրումային համագործակցության հիմքերը։ Հայաստանից «Ջերմուկի», կոնյակի որոշ տեսակների արտահանման արգելքի ֆոնին, ինչպես նաև գյուղատնտեսական նշանակության ապրանքների ներմուծումն արգելելու պայմաններում Ռուսաստանի էներգետիկայի նախարարի այս հայտարարությունը ուղենշային կարելի է համարել։ Հատկապես վերջին շրջանում Ռուսաստանն ամենօրյա պարբերականությամբ և տարբեր գործիչների բերաններով Հայաստանին զգուշացնում է, որ կարող է լուրջ խնդիրների բախվել, առավել ևս, որ Հայաստանի իշխանության ղեկավարը հրաժարվել է մասնակցել մայիսի վերջին կայանալիք ԵԱՏՄ նիստին՝ իր փոխարեն ուղարկելով Մհեր Գրիգորյանին։

Վերջինս, նշենք, միակն է Հայաստանի գործող իշխանությունների կազմում, որ դեռևս նորմալ հարաբերություններ է պահպանում ռուսական կողմի հետ՝ փորձելով հարթել սուր անկյունները։ Բայց դա չափազանց անբավարար է ռուսական կողմի բարեհաճությունը ստանալու համար, առավել ևս, որ Հայաստանի իշխանություններն իրենց վարած քաղաքականությունն ամբողջությամբ տեղավորում են Արևմուտքի ծիրում։ Սա, իհարկե, լուրջ վտանգներ է պարունակում թե՛ քաղաքական, և թե՛ տնտեսական առումով։

Բնականաբար, Ռուսաստանից արձագանքները խիստ են լինելու և առաջիկայում գնալով ավելի են խստանալու։ Իսկ գազի և նավթամթերքի մատակարարումների գների աճը ծանրագույն հետևանքներ է ունենալու ոչ միայն տնտեսության, այլև առանձին վերցրած յուրաքանչյուր քաղաքացու վրա։ Ի դեպ, նույնիսկ այս հանգամանքը չի ստիպում գործող իշխանություններին փոխել իրենց քաղաքականությունը, գոնե փոքր-ինչ մեղմացնել այն, և առաջիկայում մենք ականատեսն ենք լինելու տնտեսական լուրջ հետևանքների։

Սոնա Գալստյան