Ջրային կոմիտեն նոր տեղակալ ունի․ ով է Նվարդ Վարդանյանը և ինչ ունեցվածք ունի նա

ArmLur.am-ը ուսումնասիրեց Ջրային կոմիտեի նորանշանակ տեղակալ Նվարդ Վարդանյանի կենսագրությունն ու ունեցվածքը։

Նվարդ Վարդանյանը նշանակվել է Ջրային կոմիտեի նախագահի տեղակալ 2026 թվականի ապրիլի 14-ին։ Մինչ այդ նա աշխատել է ՀՀ արդարադատության նախարարությունում՝ որպես գլխավոր քարտուղարի տեղակալ։ Այդ պաշտոնը նա ստանձնել է 2021 թվականի նոյեմբերի 29-ին։ Սակայն 2023 թվականի հունվարի 13-ի հրամանով, իր դիմումի համաձայն, նրա լիազորությունները դադարեցվել են, և նա ազատվել է պաշտոնից 2023 թվականի հունվարի 16-ից։

ArmLur.am-ի ուսումնասիրությամբ ներկայացնում ենք նրա հայտարարագրերի ամբողջական տվյալները։

2021 թվականի հայտարարագրի տվյալներով, պաշտոնը ստանձնելու պահին Նվարդ Վարդանյանն ունեցել է 8 միավոր անշարժ գույք։ Բանկային հաշիվների մնացորդները կազմել են 52,182.16 դրամ։ Էլեկտրոնային հաշիվներում և կրիպտոարժույթով ունեցել է 400,000 դրամ։ Կանխիկ միջոցները կազմել են 4,900 ԱՄՆ դոլար, 4,850 եվրո և 560,000 դրամ։ Ստացված փոխառությունները կազմել են 11,627,214 դրամ և 15,909 դրամ։ Վարձակալությունից ստացված եկամուտը կազմել է 450,000 դրամ։ Ընդհանուր եկամուտը կազմել է 12,093,123 դրամ։ Վարկային պարտավորությունը՝ անշարժ գույքի ձեռքբերման նպատակով, կազմել է 11,627,214 դրամ։

2023 թվականի հայտարարագրի տվյալներով, Նվարդ Վարդանյանի մոտ պահպանվել է նույն՝ 8 միավոր անշարժ գույքը։

1․ ավտոկայանատեղի՝ բաժնային սեփականությամբ, որտեղ հայտարարատուի բաժինը կազմում է 50 տոկոս, գտնվում է Հայաստանի Հանրապետություն Երևան քաղաքում, ձեռք է բերվել 2019 թվականի ապրիլի 17-ին՝ գնման եղանակով,

2․բնակարան՝ բազմաբնակարան բնակելի շենքում, բաժնային սեփականությամբ՝ 1/2 բաժնով, գտնվում է Երևան քաղաքի Արաբկիր վարչական շրջանում, ձեռք է բերվել 2019 թվականի ապրիլի 17-ին՝ գնման եղանակով,

3․ավտոկայանատեղի՝ միանձնյա սեփականությամբ, գտնվում է Երևան քաղաքի Արաբկիր վարչական շրջանում, ձեռք է բերվել 2013 թվականի նոյեմբերի 14-ին՝ գնման եղանակով,

4․ բնակարան՝ բազմաբնակարան բնակելի շենքում, միանձնյա սեփականությամբ, գտնվում է Երևան քաղաքի Արաբկիր վարչական շրջանում, ձեռք է բերվել 2013 թվականի նոյեմբերի 14-ին՝ գնման եղանակով,

5․ բնակարան՝ բազմաբնակարան բնակելի շենքում, միանձնյա սեփականությամբ, գտնվում է Երևան քաղաքի Արաբկիր վարչական շրջանում, ձեռք է բերվել 2013 թվականի նոյեմբերի 14-ին՝ գնման եղանակով,

6․ բնակարան՝ բազմաբնակարան բնակելի շենքում, միանձնյա սեփականությամբ, գտնվում է Երևան քաղաքի Արաբկիր վարչական շրջանում, ձեռք է բերվել 2018 թվականի ապրիլի 3-ին՝ գնման եղանակով,

7․բնակարան՝ բազմաբնակարան բնակելի շենքում, միանձնյա սեփականությամբ, գտնվում է Երևան քաղաքի Արաբկիր վարչական շրջանում, ձեռք է բերվել 2018 թվականի ապրիլի 3-ին՝ գնման եղանակով,

8․ավտոկայանատեղի՝ միանձնյա սեփականությամբ, գտնվում է Երևան քաղաքի Արաբկիր վարչական շրջանում, ձեռք է բերվել 2013 թվականի նոյեմբերի 14-ին՝ գնման եղանակով։

Վարդանյանը հայտարարագրել է մեկ տրանսպորտային միջոցը՝ NISSAN մակնիշի, 2015 թվականի արտադրության։

Բանկային հաշիվների մնացորդները կազմել են 287,778 դրամ։ Էլեկտրոնային հաշիվներում և կրիպտոարժույթով առկա միջոցները կազմել են 1,159,998.8 դրամ։ Կանխիկ միջոցները կազմել են 3,570 եվրո, 6,760 ԱՄՆ դոլար և 750,000 դրամ։

2023 թվականի հաշվետու ժամանակաշրջանի եկամուտները կազմել են 362,683 դրամ։ Վարձակալությունից ստացված եկամուտը՝ Կարմիր Խաչի միջազգային կոմիտեից, կազմել է 780,000 դրամ։ Աշխատավարձը՝ Արդարադատության նախարարությունից, կազմել է 561,000 դրամ։ Ընդհանուր եկամուտը կազմել է 1,703,683 դրամ։

Վարկային պարտավորությունը պաշտոնը դադարեցնելու օրվա դրությամբ կազմել է 10,318,010 դրամ՝ անշարժ գույքի ձեռքբերման վարկ։

Ա․ Վարդանյան