«Հայ Վիրտուոզներ» միջազգային ակադեմիա-փառատոնը՝ արդեն 5-րդ օրն է Երևանը վերածել դասական երաժշտության կենդանի կենտրոնի

«Երաժշտություն հանուն ապագայի» հիմնադրամի նախաձեռնությամբ իրականացվող «Հայ Վիրտուոզներ» միջազգային ակադեմիա-փառատոնը արդեն հինգերորդ օրն է, ինչ համախմբում է հայ երիտասարդ տաղանդներին և միջազգային ճանաչում ունեցող երաժիշտներին՝ հաստատելով իր կարևորագույն տեղը տարվա մշակութային իրադարձությունների շարքում։

Այս նախաձեռնության գլխավոր աջակիցն է հանդիսանում Երևանի քաղաքապետարանը, որի աջակցությամբ 70 պատանի երաժիշտներ, որոնք սովորում են Երևանի երաժշտական և արվեստի դպրոցներում, հնարավորություն ստացան մասնակցելու այս ակադեմիային։

Փառատոնը մեկնարկել է մարտի 26-ին՝ Կարեն Դեմիրճյանի անվան մարզահամերգային համալիրում կայացած հանդիսավոր բացման համերգով։ Համերգին հանդես է եկել Երևանի երիտասարդական նվագախումբը՝ բրիտանացի դիրիժոր Փիթեր Սթարկի ղեկավարությամբ, իսկ համերգի մենակատարն է եղել աշխարհահռչակ ֆրանսիացի կլարնետահար Միշել Լեթիեկը, որը այս օրերին Երևանում է և ակադեմիայի պրոֆեսոր է։

Ակադեմիայի հագեցած կրթական ծրագիրն արդեն ընթացքի մեջ է, և արդեն իրականացվել է ավելի քան 200 վարպետության դաս։ Վերջին օրերին վարպետության դասեր են անցկացրել միջազգային ճանաչում ունեցող երաժիշտներ՝ Կորդելիա Հոֆեր (դաշնամուր, Ավստրիա), Ստանիսլավ Սոլովյով (դաշնամուր, Ռուսաստան), Էսթեր Հաֆֆներ (ջութակ, Ավստրիա/Դանիա/Հունգարիա), Սերգեյ Օստրովսկի (ջութակ, Շվեյցարիա), Կորյուն Ասատրյան (սաքսոֆոն, Գերմանիա), Ալեքս Էլիա (շեփոր, Նիդերլանդներ/Իտալիա), Մարիա Կիարա Բինյոցցի (ֆագոտ, Իտալիա), Լուիզա Սելլո (ֆլեյտա, Իտաիա), Միշել Լեթիեկ (կլարնետ, Ֆրանսիա) և Ֆերնանդո Արիաս (հարվածային գործիքներ, Իսպանիա)։

Վարպետության դասերը անցկացվում են Երևանի մի շարք երաժշտական և արվեստի կրթօջախներում՝ Արմեն Տիգրանյանի անվան երաժշտական դպրոց, Ղազարոս Սարյանի անվան արվեստի դպրոց, Սայաթ-Նովայի անվան երաժշտական դպրոց, Ալեքսանդր Սպենդիարյանի անվան երաժշտական դպրոց, Հայկանուշ Դանիելյանի անվան արվեստի դպրոց, Ալեքսանդր Աճեմյանի անվան երաժշտական դպրոց, Չայկովսկու անվան երաժշտական մասնագիտացված միջնակարգ դպրոց և Անահիտ Ցիցիկյանի անվան Երաժշտական դպրոց՝ ապահովելով մասնակիցների համար բարձրորակ կրթական միջավայր։

Ակադեմիա-փառատոնի շրջանակում արդեն կայացել են երկու կարևոր պանելային քննարկումներ՝

• «Ո՞վ է հետաքրքրված դասական արվեստով այսօր» – Կերոն հիմնադրամի և «Երաժշտություն հանուն ապագայի» հիմնադրամի համագործակցության շրջանակներում Վերնատանը իրականացված քննարկում, որի ընթացքում անդրադարձ է կատարվել դասական արվեստի ապագային՝ հնչեցնելով տարբեր տեսակետներ և խթանելով երիտասարդների ակտիվ ներգրավվածությունը։
  Բանախոսներ
  Գևորգ Պողոսյան (խոսնակ/մոդերատոր) - «Կերոն» զարգացման հիմնադրամ, «Տաղանդների ֆոնդ» ծրագրի տնօրեն
  Աննա Տեր-Հովակիմյան - «Երաժշտություն ապագայի համար» հիմնադրամ, տնօրեն-Արթուր Աթայան - «Հոսք» հիմնադրամ, արտադրության ղեկավար
  Յաշա Իսրայելևիչ - «Տաղանդների ֆոնդ» ծրագրի մասնակից, գալարափողահար Հայաստանի պետական ​​սիմֆոնիկ նվագախմբում
  Միշել Լեթիեկ - ֆրանսիացի կլարնետահար 
  
  
• «Երաժշտի կարիերա՝ երազա՞նք, թե՞ իրականություն. գործիքներ և խորհուրդներ» – Մատենա առաջնորդության և մասնագիտական զարգացման միջազգային դպրոցի և հիմնադրամի համագործակցության շրջանակներում կայացած քննարկում, որը ներկայացրեց երաժշտական կարիերայի զարգացման գործնական մոտեցումներ։
  Բանախոսներ
  Լուիզա Սելլո | Ֆլեյտահար, Իտալիա
  Կորդելիա Հոֆեր | Դաշնակահար, Ավստրիա
  Տիգրան Մնացականյան | Մատենա միջազգային առաջնորդության և մասնագիտական զարգացման դպրոցի Ակադեմիական տնօրեն
  Ֆերնանդո Արիաս | Հարվածային գործիքների երաժիշտ, Իսպանիա
  Մարտին Ուլիխանյան | Կոմպոզիտոր/Գործիքավորող

Մինչև ապրիլի 4-ը շարունակվող ակադեմիա-փառատոնը միավորել է ավելի քան 130 պատանի երաժիշտների՝ «Երաժշտություն հանուն ապագայի» հիմնադրամի «Հայ Վիրտուոզներ» և «Ծնվել եմ Արցախում» ծրագրերի կրթաթոշակառուներին, ինչպես նաև Երևանի երաժշտական և արվեստի դպրոցների սաներին։ Ծրագրի ընթացքում նախատեսված է շուրջ 350 վարպետության դաս՝ աշխարհի տարբեր երկրներից ժամանած մոտ 20 անվանի արտիստների մասնակցությամբ։

Նշում․ Այս մամլո հաղորդագրությունը տարածվում է «Երաժշտություն հանուն ապագայի» հիմնադրամի կողմից։