155 հազար դոլար կանխիկ, 8 անշարժ գույք․ ինչ ունի ՍԱՏՄ ղեկավարը. «Ժողովուրդ»
ՄԱՄՈՒԼԻ ՏԵՍՈՒԹՅՈՒՆ
«Ժողովուրդ» օրաթերթը գրում է. ««Ժողովուրդ» օրաթերթը ուսումնասիրել է Տիգրան Պետրոսյանի հայտարարագրային տվյալները և արձանագրել մի շարք անշարժ գույքեր, տրանսպորտային միջոցներ, խոշոր չափի կանխիկ միջոցներ և, տարօրինակ է, վարկային պարտավորություններ։
Տիգրան Պետրոսյանը ՀՀ Սննդամթերքի անվտանգության տեսչական մարմնի ղեկավար է նշանակվել 2025 թվականի հուլիսի 24-ին։ Մինչ այդ՝ 2024 թվականի նոյեմբերի 26-ից, աշխատել է նույն կառույցում որպես ղեկավարի տեղակալ։ Ավելի վաղ նա զբաղեցրել է նաև պետական և մասնավոր հատվածի մի շարք պաշտոններ՝ աշխատելով ՀՀ վարչապետի աշխատակազմում գործող ՊՈԱԿ-ներում, ինչպես նաև բիզնես ոլորտում։
8 անշարժ գույք Երևանում և Արմավիրի մարզում
Հայտարարագրի համաձայն՝ պաշտոնյան ունի ընդհանուր առմամբ 8 միավոր անշարժ գույք։ Դրանց թվում են բնակարաններ Երևանում, հողամասեր Արմավիրի մարզի Վաղարշապատ քաղաքում, ինչպես նաև ավտոկայանատեղի և կիսակառույց շինություն։
Մասնավորապես՝
• կիսակառույց շինություն Երևանում՝ Ավան վարչական շրջանում (ձեռք է բերվել 2024 թվականին),
• երեք հողամաս Վաղարշապատում,
• բնակարան Երևանում՝ Կենտրոն վարչական շրջանում (ձեռք է բերվել 2023 թվականին),
• ավտոկայանատեղի և երկու բնակարան Արաբկիր վարչական շրջանում։
Ավտոմեքենաներ և թանկարժեք ժամացույց
Տիգրան Պետրոսյանը հայտարարագրել է նաև երկու տրանսպորտային միջոց՝
• FORD բեռնատար ավտոմեքենա (2001 թ.),
• MERCEDES-BENZ (2019 թ.) ավտոմեքենա։
Խոշոր չափի կանխիկ միջոցներ
Պաշտոնյան հայտարարագրել է նաև զգալի չափի կանխիկ միջոցներ՝
• 155,000 ԱՄՆ դոլար,
• 17,000 եվրո,
• 118 մլն դրամ։
Միաժամանակ բանկային հաշիվներում առկա մնացորդը կազմել է մոտ 2 մլն 952 հազար դրամ։
Եկամուտներ
Հայտարարագրի համաձայն՝
• Սննդամթերքի անվտանգության տեսչական մարմնից ստացած աշխատավարձը կազմել է 154,744 դրամ,
• «Սպասարկում» ՊՈԱԿ-ից ստացած աշխատավարձը՝ 3,750,041 դրամ։
Այսպիսով, հաշվետու տարում պաշտոնյայի ընդհանուր եկամուտը կազմել է 3,904,785 դրամ։
Վարկային պարտավորություններ
Տիգրան Պետրոսյանը հայտարարագրել է նաև 151,338,941 դրամի վարկային պարտավորություններ, որոնց թվում կան մի քանի վարկեր, այդ թվում՝ հիփոթեքային վարկ բնակարանի ձեռքբերման համար։
Բիզնես մասնակցություն
Հայտարարագրի համաձայն՝ պաշտոնյան ունի նաև 50 տոկոս բաժնեմաս «Էյր Լոգիստիկ Կարգո» ՍՊԸ-ում։
Հարցեր առաջացնող հանգամանքներ
Հայտարարագրային տվյալները մի շարք հարցադրումներ են առաջացնում։ Մասնավորապես՝ պաշտոնյայի մոտ առկա են խոշոր չափի կանխիկ միջոցներ, որոնք զգալիորեն գերազանցում են նրա հայտարարագրված տարեկան եկամուտները։ Հարց է առաջանում՝ որտեղից են այդքան կանխիկ միջոցները, և ինչու է նա միևնույն ժամանակ ունեցել ավելի քան 151 մլն դրամի վարկային պարտավորություններ։
Բացի այդ, պետական բարձր պաշտոն զբաղեցնող անձի կողմից առևտրային կազմակերպությունում 50 տոկոս մասնակցության պահպանումը հաճախ դառնում է շահերի հնարավոր բախման քննարկման առարկա, ինչը պետք է գնահատի Կոռուպցիայի կանխարգելման հանձնաժողովը։
Թեև այս տվյալները ներկայացված են պաշտոնյայի կողմից օրենքով սահմանված կարգով, այնուամենայնիվ դրանց մի մասը կարող է առաջացնել լրացուցիչ հարցեր՝ հատկապես կանխիկ միջոցների ծագման աղբյուրների և բիզնես մասնակցության համատեքստում։ Բայց որ մարդը ՔՊ իշխանության օրոք ձեռքբերումներ ունի, ակնհայտ է»։
