Փաշինյանի թիմը ընդդիմությանը ներկայացնում է որպես «պատերազմի հրձիգ»

Հայաստանի գործող իշխանությունները, որոնք իրենց գլխավոր կարգախոս հռչակել են խաղաղությունը, պետք է ընդդիմությանը հռչակեին որպես պատկեր պատերազմ հրահրողներ։ Երեկ խորհրդարանում Ազգային ժողովի փոխնախագահ Ռուբեն Ռուբինյանը բացեիբաց հայտարարել է, թե խորհրդարանական և արտախորհրդարանական ընդդիմությունը պատերազմի կուսակցություն է։

Այս «կուսակցության» մեջ Ռուբինյանը ներառել է և՛ «Հայաստան» դաշինքը, և՛ «Հայաստանի Հանրապետական» կուսակցությունը, և՛ «Միասնության թևեր» քաղաքական նախաձեռնությունը, որն ԱԺ փոխխոսնակը համարում է ՀՀԿ-ի հետ փոխկապակցված, ինչպես նաև «Ուժեղ Հայաստան» և «Բարգավաճ Հայաստան» կուսակցությունները։ Ընդ որում, նա «Ուժեղ Հայաստանը» համարում է Ռուսաստանի հետ փոխկապակցված, իսկ «Բարգավաճ Հայաստանը»՝ Բելառուսի հետ։ «Ես սա ասում եմ ամենայն պատասխանատվությամբ՝ 2020 թվականից հետո ինչ հայտարարել եք, դրանցից մեկը մենք լսեինք, ձեր ասածով անեինք՝ մեր երկիրը չէր լինի տարածքային իր ամբողջականության սահմաններում, ու մի հինգ անգամ մենք պատերազմի մեջ եղած կլինեինք։ Եթե մի անգամ ձեզ լսած լինեինք։ Ու հիմա դուք շարունակում եք նույն գիծը», - ասել է Ռուբինյանը՝ հավելելով, թե առաջիկա խորհրդարանական ընտրություններում ընդդիմության հաղթանակն անմիջապես կհանգեցնի Ադրբեջանի հետ հակամարտության վերսկսմանը։ Ավելին, պատերազմը սկսելու մեղքը իշխանության ներկայացուցիչը հեռակա կարգով բարդում է հենց ընդդիմության վրա։ Այս ամենը վկայում է, որ գործող իշխանությունները ամեն ինչ անում են խաղաղության դիսկուրսի չարաշահումը արդյունաբերական հիմքերի վրա դնելու և այդ կերպ իրենց հաղթանակը ապահովագրելու համար։

Բնականաբար, իշխանական այս նարատիվի տարածումը կեղծ է․ ավելի շատ արհավիրքներ և պատերազմներ Հայաստանին բերել է հենց փաշինյանական իշխանությունը, ավելի շատ տարածք կորցրել ենք նրանց օրոք, և այսօր էլ խաղաղության օրակարգը, պարզ ասած, ձախողված է, բայց և իշխանությունը շարունակելու է նույն տեմպով չարաշահել խաղաղության խոսույթը, որովհետև այլ որևէ կռվան ընդդիմության դեմ պայքարում չունի։

Մանե Կիրակոսյան