«Փաշինյանը դեմ չէ Հայաստանում ռուսական ռազմաբազայի տեղակայմանը. Ի՞նչ է դա նշանակում»

Հանդես գալով Լեհաստանի միջազգային հարաբերությունների ինստիտուտում և պատասխանելով այն հարցին, թե արդյո՞ք Հայաստանը խնդրել է Ռուսաստանին կրճատել իր ռազմական ներկայությունը, ՀՀ վարչապետ Նիկոլ Փաշինյանը հայտարարել է, որ Երևանը չունի երկրում տեղակայված ռուսական ռազմաբազան դուրս բերելու ծրագրեր, գրում է tehnowar.ru–ն։ «Մենք որևէ պլան, ծրագիր կամ մտահոգություն չունենք Հայաստանում 102-րդ ռուսական ռազմաբազայի (որը տեղակայված է Շիրակում) ներկայության վերաբերյալ», - ասել է Փաշինյանը։ Նա նաև նշել է, որ Հայաստանի և Ռուսաստանի միջև հարաբերությունները ներկայումս վերափոխման փուլում են։ «Այսօր մենք նոր հարաբերություններ ենք ձևավորում Ռուսաստանի հետ։ Մենք վճռական ենք և կցանկանայինք զարգացնել համագործակցությունը Ռուսաստանի հետ, բայց փաստն այն է, որ այդ հարաբերությունները փոխվում են մի շարք գործոնների պատճառով», - հավելել է Փաշինյանը։

Ըստ Ռուսաստանի ցամաքային զորքերի նախկին գլխավոր հրամանատար, բանակի գեներալ Վլադիմիր Բոլդիրևի ռուսական զորքերի ներկայությունը Շիրակում մնում է ձեռնտու Նիկոլ Փաշինյանի համար հաշվի առնելով հնարավոր արտակարգ իրավիճակները և Ադրբեջանի ու Թուրքիայի հետ առկա լարվածությունը։ «Գյումրու ռազմաբազայում գտնվող ռուսական զորքերը տեղակայված են ԱՊՀ-ի հարավային սահմաններին և կատարում են պայմանագրային պարտավորություններ այն երկրի հետ, որի տարածքում  տեղակայված են։ Կա սահման ՆԱՏՕ-ի անդամ երկրի՝ Թուրքիայի հետ։ Հետևաբար, մեր ներկայությունը այնտեղ կարևոր է, քանի որ մեր պոտենցիալ հակառակորդը այնտեղ է», - ասել է Բոլդիրևը։

Նա պարզաբանել է, որ Զանգեզուրի միջանցքի երկայնքով այսպես կոչված «Թրամփի երթուղու» իրականացման համատեքստում արդեն ճնշում է գործադրվում Հայաստանի վարչապետի վրա ռուսական զորքերի ներկայության հարցով։ «Թուրքերն ու ամերիկացիները արդեն ճնշում են գործադրում Փաշինյանի վրա Շիրակում մեր ռազմական ներկայության վերաբերյալ, բայց Փաշինյանի շահերից չի բխում, որ մենք հիմա հեռանանք։ Դրա համար կան բազմաթիվ պատճառներ։ Օրինակ Ադրբեջանի և Թուրքիայի պատճառով։ Հիմա ամեն ինչ կարող է պատահել։ Ավելին, ռուսական ռազմական կոնտինգենտի առկայությունը չի թուլացնում, այլ ընդհակառակը, ամրապնդում է Փաշինյանի դիրքերը, քանի որ մենք այնտեղ ոչնչի չենք հավակնում», - եզրափակել է Բոլդիրևը։

Ավելի վաղ Ռազմաքաղաքական վերլուծության բյուրոյի ղեկավար Ալեքսանդր Միխայլովը նշել էր, որ նույնիսկ եթե Զանգեզուրի միջանցքը այսպես կոչված «Թրամփի երթուղու» վերածող նախագիծը կյանքի կոչվի, Միացյալ Նահանգները իր զորքերը չի տեղակայի Հայաստանում, քանի որ ստեղծված իրավիճակում նրանց շահերից չի բխում Ռուսաստանի Դաշնության հետ հարաբերությունների վատթարացումը։

Նյութը հրապարակման պատրաստեց Կամո Խաչիկյանը

www.1or.am