Ընդդիմության պառակտումը բխում է Փաշինյանի շահերից

Մինչ հանրային կարծիքը պահանջում է, որ ընդդիմությունը համախմբվի, առնվազն 3-4 խոշոր միավորներով մասնակցի ընտրություններին Նիկոլ Փաշինյանին պաշտոնանկ անելու համար, Հայաստանի երկրորդ և երրորդ նախագահների թիմերի միջև հակասությունները չեն հանդարտվում։

Օրեր առաջ «Հայաստան» խմբակցության պատգամավոր Աղվան Վարդանյանն էր քննադատել ՀՀԿ-ին և Սերժ Սարգսյանին, ի պատասխան էլ ՀՀԿ փոխնախագահ Արմեն Աշոտյանն էր կոշտ պատասխանել վերջինիս։ Երեկ էլ Սերժ Սարգսյանը դատական նիստից հետո, լրագրողների հետ զրույցում ասել էր, թե քաղաքական ուժերն իրեն մոտեցել ու բանակցել են ընտրությունների հետ կապված, սակայն թե որ ուժերի մասին է խոսքը՝ չէր մանրամասնել:

Նա համակարծիք չէ այն տեսակետի հետ, թե իր և ՀՀ 2-րդ նախագահ Ռոբերտ Քոչարյանի քաղաքական թիմերի միջև պայքարը թեժացել է: «Ես ուղղակի կարծում եմ, որ ջրերը զուլալվում են, մենք այստեղ որևէ խնդիր չունենք: Բոլոր քաղաքական ուժերը, որոնք կփորձեն մեր հաշվին «աչոկ» հավաքել՝ իբր մեր շանսերը նվազեցնելու համար, ակնհայտ է, որ նրանց ասվելու է ճշմարտությունը: Եթե նրանք փորձում են ուրիշին մի բան վերագրել, ապա բոլորը կլսեն ճշմարտությունը. որևէ կոմպլեքս չունենք»,– ասել էր Սարգսյանը:

Հարցը, թե ո՚վ է ճիշտ, ո՞վ սխալ այս «փոխհրաձգության» մեջ, անտեղի ու ժամանակավրեպ է։ Ի վերջո, ընդդիմության մեջ ցանկացած բախում առաջին հերթին բխում է գործող իշխանության ու Նիկոլ Փաշինյանի շահերից։ Սա է, որ պիտի հստակ հասկանան երկրորդ ու երրորդ նախագահի թիմերը, ու եթե ցանկանում են իսկապես հեռացնել Փաշինյանին, պետք է կարողանան մի կողմ դնել հակասությունները, ընդհանուր օրակարգ ձևավորել։

Մանե Կիրակոսյան