Իշխանությունը սարսափում է «Գյումրի 2» սցենարից
ՎԵՐԼՈՒԾՈՒԹՅՈՒՆՆԵՐ
Հայաստանի գործող իշխանություններին ամենամեծ կատաղության հասցնող արտահայտությունը դարձել է «Գյումրի 2»-ը։ Ընդդիմության շրջանում տեղի ունեցող խորքային իրադարձությունները, բավականին լայն համախմբումները, տարբեր կուսակցությունների միավորումները խուճապի են մատնել գործող իշխանություններին, որոնք ցուցադրում են իրենց վախերը «Գյումրի 2» սցենարից։
Հիշեցնենք՝ անցած տարի Գյումրիում տեղական ընտրություններից հետո ընդդիմադիր ուժերը միավորվեցին՝ թույլ չտալով, որ «Քաղաքացիական պայմանագիրը» այնտեղ իշխանություն վերցնի։ Բնականաբար «Գյումրի 2»-ի փորձ ձեռնարկվեց նաև Վաղարշապատի ընտրություններում, սակայն «Քաղպայմանագրին» հաջողվեց տարբեր մեթոդներով պահպանել իշխանությունը Վաղարշապատում։ Սակայն իրենք էլ հասկանում են, որ այդ մեթոդը լուրջ վտանգ է ներկայացնում իրենց համար համապետական կտրվածքով, առավել ևս որ իշխանությանը մերձ և փսևդո ընդդիմադիր կուսակցությունները չունեն բավարար աջակցություն հանրության մեջ, իշխանության վարկանիշը գնալով նվազում է, իսկ ընդդիմադիր ուժերը լայն կոնսոլիդացիայի՝ 3–4 մեծ դաշինքներով մասնակցելու դեպքում միասին շատ ավելի մեծ քանակությամբ քվեներ կստանան, քան իշխող ուժը։
Բնական է, որ դրանից հետո ընդդիմությունը կմիավորվի՝ իշխանությունից զրկելով Փաշինյանի թիմին։ ՀՅԴ Գերագույն մարմնի ներկայացուցիչ Իշխան Սաղաթելյանը վստահ է, որ իշխանությունը սարսափում է «Գյումրի 2» սցենարից։ Իսկ այս սցենարի մասին սկսեցին խոսել «Բարգավաճ Հայաստան» կուսակցության շուրջ լայն համախմբում սկսելուց հետո։ Տարբեր քաղաքական ուժեր և կուսակցություններ, օրինակ՝ «Մայր Հայաստանը», «Դեմոկրատական այլընտրանքը», Միհրան Պողոսյանի կուսակցությունը, հայտարարել են ընտրություններին «Բարգավաճ Հայաստանի» հետ մասնակցելու մտադրության մասին։ Խոսվում է նաև ԱԱԾ նախկին պետ Արթուր Վանեցյանի միավորվելու հնարավորության մասին։
Հենց այս հանգամանքն է լուրջ մտահոգել իշխանություններին, որոնք հասկանում են, որ «Բարգավաճ Հայաստանը», «Ուժեղ Հայաստան» կուսակցությունն ու «Հայաստան» դաշինքն առանձին-առանձին գնալու դեպքում էլ կարող են հասնել գործող իշխանությունների իշխանազրկմանը, ուստի և առաջնային թիրախում հենց այս ուժերն են լինելու։
Սոնա Գալստյան
