Ընդդիմության համախմբումը խառնում է Փաշինյանի պլանները

Խորհրդարանական ընտրություններից առաջ Նիկոլ Փաշինյանն ամեն ինչ անում է, որ մասնակից ուժերի թիվը հնարավորինս շատ լինի՝ այդկերպ փոշիացնելով ընդդիմության ձայները և կրկին կարողանալով վերարտադրվել։ Բայց ընդդիմության մեջ տեղի ունեցող գործընթացները վկայում են, որ հիմնական ընդդիմադիր ուժերը գնալու են 3–4 անցողիկ ճակատներով, արդեն բացեիբաց խոսում են համապետական մակարդակով «Գյումրի-2» իրականացնելու մտադրության մասին։ Այս հանգամանքը, բնականաբար, լրջորեն մտահոգում է Նիկոլ Փաշինյանին և նրա թիմին, ուստի զարմանալի չէ, որ քպականներն ամենժամյա պարբերականությամբ հայտնվում են որևէ լրատվամիջոցի եթերում, սպառնալիքներ հնչեցնում թե՛ Սամվել Կարապետյանի «Ուժեղ Հայաստանի», թե՛ 2-րդ նախագահ Ռոբերտ Քոչարյանի, թե՛ այժմ էլ արդեն «Բարգավաճ Հայաստան» կուսակցության նախագահ Գագիկ Ծառուկյանի հասցեին։

Առաջիկայում ՔՊ-ի այս խուճապը և ապատեղեկատվական արշավը գնալով ավելի ու ավելի են սրվելու։ Գործող իշխանությունները հրաշալի հասկանում են, որ իրենք այլևս տանուլ են տալիս, իսկ Փաշինյանի փառատենչությունը, ինչպես նաև անձնական անվտանգությունն ամեն գնով ապահովելու մոլուցքը նրանց մղելու են ամենավատ քայլերի։ Այստեղ առաջին տեղը տրված է ոչ թե հենց կուսակցականներին, որոնք անգամ ողջամիտ մտքեր ձևակերպել չեն կարողանում, այլ իրավապահ համակարգի վրա, որն էլ լինելու է ընդդիմության դեմ Փաշինյանի գլխավոր մահակը։

Ոստիկանությանը, դատախազությանը, քննչականին իր գործառույթն է տրված, օգտագործելու են նաև փետրվարի 7-ին ուժի մեջ մտած հրամանագրի խստացված իրավակարգավորումները՝ ընդդիմության դեմ իրավական, նաև բռնի մեթոդներով պայքարելու համար։ Արդյոք իրավապահ համակարգը հասկանո՞ւմ է, որ սա կարող է հետևանքներ ունենալ հենց իր համար, որ նոր իշխանությունը առաջին հերթին պատժելու է ապօրինություններ կատարած ոստիկաններին, քննիչներին, դատախազներին և դատավորներին։ Այդ համակարգերում էլ լուրջ մտահոգություններ կան, գիտակցում են, որ իրենց համար լրջագույն հետևանքներ կարող են լինել, ուստի և առաջիկայում չի բացառվում, որ տարբեր ուժային կառույցների ներկայացուցիչներ պարզապես դիմում գրեն և դուրս գան՝ հրաժարվելով կատարել Փաշինյանի քմահաճույքները։

Մանե Կիրակոսյան