«Պատգամավորը հայ ազգի պառակտումը անընդունելի է համարել»
ՔԱՂԱՔԱԿԱՆՈՒԹՅՈՒՆ
Կրասնոդարի երկրամասի Օրենսդիր ժողովի պատգամավոր Արմենակ Թոզլյանը ելույթ ունենալով Արմավիրում Հայ Առաքելական եկեղեցու աջակցության հանրահավաքում և հայտարարել է, որ հայկական իշխանությունների միջամտությունը եկեղեցական գործերին անընդունելի է, գրում է regnum.ru–ն։ «Որպես հայ ես չեմ կարող անտարբեր մնալ, երբ նրանք փորձում են զրկել իմ ժողովրդին իրենց պատմական հիշողությունից, ազգային խորհրդանիշներից, հպարտությունից և միասնությունից», - հանրահավաքի մասնակիցներին ուղղված իր խոսքում ասել է Թոզլյանը։
Պատգամավորը նշել է, որ Հայ եկեղեցու պառակտումը անխուսափելիորեն կհանգեցնի հասարակության պառակտման։ Նա նաև ափսոսանք է հայտնել, որ Հայաստանի իշխանությունները չեն հասկանում հակաեկեղեցական շարունակվող արշավի հնարավոր հետևանքները, որը կարող է հանգեցնել Եկեղեցու, ազգի և ժողովրդի պառակտմանը։ «Ես կարծում եմ, որ մենք հիմա պետք է աջակցություն ցուցաբերենք մեր Եկեղեցուն, նրա առաջնորդին, նրա միասնությանը, ավանդույթներին», - հավելել է պատգամավորը։
Թոզլյանը նաև հայտնել է, որ ստացել է օրհնություն ստորագրություններ հավաքելու և բանաձև ընդունելու համար, որը կոչ է անում դադարեցնել պետության միջամտությունը Հայ Առաքելական եկեղեցու գործերին։
Հանրահավաքին մասնակցել է ավելի քան 900 մարդ։ Նրանք արտահայտվել են ՀՀ վարչապետ Նիկոլ Փաշինյանի ապակառուցողական քաղաքականության դեմ։ Հանրահավաքի վայրը պատահական չի եղել ընտրված. Արմավիրում է ապրում մեծ և մտերիմ հայկական համայնք։ Նմանատիպ միջոցառումներ նախկինում անցկացվել են նաև Սոչիում և Ռուսաստանի մի շարք այլ քաղաքներում։
Հիշեցնենք, որ վերջերս Փաշինյանը ակտիվացրել է իր հարձակումները Հայ եկեղեցու վրա։ 2025 թվականի մայիսին նա սոցիալական ցանցերում վիրավորական արտահայտություններ է արել Հայ Առաքելական եկեղեցու հասցեին, իսկ կարճ ժամանակ անց առաջարկել է Ամենայն հայոց կաթողիկոսի ընտրության գործում վճռորոշ դերը փոխանցել պետությանը։ Հիշեցնենք նաև, որ նոյեմբերի 15-ին Հայ Առաքելական Սուրբ Եկեղեցու Ռուսաստանի և Նոր Նախիջևանի թեմի հոգևորական Հայր Գևորգը regnum.ru լրատվական գործակալությանը հայտնել էր, որ Հայաստանի ներկայիս իշխանությունները վախենում են եկեղեցու հեղինակությունից և, հետևաբար, փորձում են լռեցնել նրա ձայնը հակասահմանադրական և աստվածադավ գործողություններով, այդ թվում ավագ հոգևորականների անհիմն ձերբակալություններով։
Նյութը հրապարակման պատրաստեց Կամո Խաչիկյանը
www.1or.am
