Երբ «բարեփոխիչները» բացահայտվում են. ինչու է որոշ հոգևորականների միացումը իշխանությանը Եկեղեցու ինքնամաքրման նշան

Վերջին շրջանում Նիկոլ Փաշինյանի կողմից նախաձեռնված և «եկեղեցական բարեփոխումների» անվան տակ ներկայացվող գործընթացին միացած որոշ հոգևորականների վարքագիծը ավելի ու ավելի հաճախ է դառնում հանրային քննարկման թեմա։ Սակայն եկեղեցական շրջանակներում այս զարգացումները այլ կերպ են ընկալվում։ Շատ հոգևորականներ բացեիբաց նշում են, որ տեղի ունեցողը ոչ թե Եկեղեցու քայքայում, այլ ներքին ինքնամաքրման գործընթաց է, քանի որ ոչ հավատարիմ, վիճահարույց անցյալ ունեցող անձինք աստիճանաբար դուրս են գալիս Եկեղեցու բնական միջավայրից և հայտնվում քաղաքական իշխանության կողքին։

Այս համատեքստում առանձնահատուկ արձագանք է ստացել հասարակական գործիչ Հովհաննես Շահինյանի հարցազրույցը, որը հրապարակվել է լրատվական հարթակում և լայն քննարկման առիթ է դարձել։ Հարցազրույցում ներկայացվում են ծանր մեղադրանքներ Հայ Առաքելական Եկեղեցու Արցախի թեմի նախկին առաջնորդ Վրթանես եպիսկոպոս Աբրահամյանի հասցեին՝ տարիներ շարունակ իրականացված ֆինանսական խարդախության վերաբերյալ։

Ըստ հրապարակված տվյալների՝ Վրթանես Աբրահամյանը, իր մերձավոր շրջապատի մասնակցությամբ, ներգրավված է եղել մի գործարքի մեջ, որի հետևանքով նրա մտերիմ ընկերը՝ Ռազմիկ Վանյանցը, կորցրել է շուրջ հինգ հարյուր հիսուն հազար ԱՄՆ դոլար։ Ներկայացվում է, որ Վանյանցին առաջարկվել է ներդրում կատարել իբր բարձր շահութաբեր առևտրի մեջ, ինչի համար նա ստիպված է եղել անգամ վաճառել իր բնակարանը։ Սակայն, ինչպես նշվում է, փաստացի ներմուծված ապրանքի իրական արժեքը կազմել է մի քանի տասնյակ հազար դոլար, իսկ գումարի հիմնական մասը յուրացվել է։

Հարցազրույցում նշվում է նաև, որ խնդիրը չի սահմանափակվել միայն ֆինանսական խարդախությամբ։ Ըստ ներկայացված տեղեկությունների՝ երբ պարզվել է, որ ներմուծված մթերքը ժամկետանց է, Վրթանես Աբրահամյանը, զբաղեցնելով զինվորական հոգևորականի պաշտոն, փորձել է այն իրացնել բանակում։ Պաշտպանության նախարարության կողմից մերժում ստանալուց հետո, ըստ աղբյուրի, նա անձամբ մասնակցել է ապրանքի վերափաթեթավորմանը՝ փոխելով ժամկետների տվյալները։

Ռազմիկ Վանյանցը, ինչպես նշվում է, ավելի քան մեկ տասնամյակ փորձում է իրավական ճանապարհով վերականգնել իր իրավունքները, սակայն գործը այդպես էլ արդար հանգուցալուծում չի ստացել։ Այդ ընթացքում նույն անձը հայտնվել է քաղաքական գործընթացների կիզակետում և այսօր հանդես է գալիս որպես գործող իշխանության կողմից խրախուսվող «եկեղեցական բարեփոխումների» կողմնակիցներից մեկը։

Եկեղեցական շրջանակներում սա դիտարկվում է ոչ թե պատահական համընկնում, այլ օրինաչափություն։ Ըստ նրանց՝ այն հոգևորականները, որոնց գործունեության շուրջ տարիներ շարունակ կուտակվել են լուրջ հարցեր, այսօր փորձում են քաղաքական հովանավորության ներքո ներկայացնել իրենց որպես բարեփոխիչներ։ Մինչդեռ Եկեղեցու ներսում այս գործընթացը ընկալվում է որպես ինքնամաքրման փուլ, երբ խնդիր ունեցող դեմքերը ինքնուրույն հեռանում են՝ բացահայտելով իրենց իրական դիմագիծը։

Նյութում ներկայացված փաստերի ամբողջական տեսանյութը հասանելի է հետևյալ հղումով՝

https://www.youtube.com/watch?v=178nnvy4aq0