Իրանի պաշտպանության նախարարը հայտնել է, որ ցուցարարները մարդկանց սպանելու համար ստացել են 3500 դոլար
ՄԻՋԱԶԳԱՅԻՆ
Իրանում ցուցարարները օրեր շարունակ տեղի ունեցած անկարգությունների ժամանակ մարդկանց սպանելու համար ստացել են 3500 դոլար, մեքենաներ այրելու համար՝ գրեթե 1500 դոլար, իսկ ոստիկանական բաժանմունքները հրկիզելու համար՝ մոտ 500 դոլար։ Ինչպես հաղորդում է «Արմենպրես»-ը՝ վկայակոչելով ՏԱՍՍ-ը, այս մասին հայտարարել է Իրանի պաշտպանության նախարար Ազիզ Նասիրզադեն։
«Մենք ունենք հավաստի տեղեկություններ, որ Միացյալ Նահանգները, սիոնիստական ռեժիմը (խմբ․՝ նկատի ունի Իսրայելը) և նրանց որոշ դաշնակիցներ ստեղծել են կենտրոն՝ անջատողականներին և ահաբեկիչներին օգնելու համար։ Նրանք նույնիսկ սահմանել են Իրանում ավերածությունների համար փոխհատուցում», – ասել է նախարարը՝ մեջբերելով նշված գումարային տվյալները։
Ազիզ Նասիրզադեի խոսքերն է մեջբերել Իրանի պետական հեռարձակող ընկերությունը։
Ավելի վաղ Իրանի ԱԳ նախարար Աբբաս Արաղչին հայտարարել էր, որ երկիրը մի քանի շաբաթ ցնցած ցույցերն իրականացվել են «դրսից եկած ահաբեկչական տարրերի կողմից», որոնք հարձակվել ու կրակել են ոստիկանների և իրավապահների վրա։ «Նրանք ողջ-ողջ այրել են ոստիկանների, գլխատել են նրանց, կրակել են ինչպես ոստիկանների, այնպես էլ սովորական մարդկանց վրա։ Արդյունքում երեք օր շարունակ մենք փաստացիորեն կռվել ենք ահաբեկիչների, այլ ոչ թե ցուցարարների դեմ»,- ասել է նա։ Իրանի ԱԳ նախարարի խոսքով՝ այդ «ահաբեկիչների» նպատակը մեկն է եղել՝ ԱՄՆ-ին ներքաշել հակամարտության մեջ։ Արաղչին կատարվածի համար մեղադրել է Իսրայելին՝ նշելով, որ տեղի ունեցածն իսրայելական ծրագրի մաս է եղել։
