Խեյվայ Թան. Հայաստանն աշխարհագրորեն շատ լավ է դիրքավորված
ՎԵՐԼՈՒԾՈՒԹՅՈՒՆՆԵՐ
Կովկասն աշխարհաքաղաքական առումով շատ շահավետ դիրք ունեցող տարածաշրջան է, ուստի Չինաստանը «Մետաքսի ճանապարհի» երկայնքով գործընկերներ է փնտրում ինչպես հարավում, այնպես էլ Եվրոպայում, գրում է ok.ru–ն։
Նման կարծիք է «Եվրասիական հետազոտություններ ժամանակակից Չինաստանի և Եվրասիայի վերաբերյալ» երևանյան միջազգային գիտաժողովում հայտնել Հոնկոնգի համալսարանի պրոռեկտոր, պրոֆեսոր Խեյվայ Թանը անդրադառնալով այն հարցրին, թե արդյո՞ք Չինաստանի ուշադրությունը Հայաստանի նկատմամբ մեծացել է ռազմավարական գործընկերության համաձայնագրի ստորագրումից հետո:
Չինացի պրոֆեսորի համոզմամբ Կովկասը, Ռուսաստանը, Միջերկրածովյան ավազանը, Կենտրոնական Ասիան Չինաստանի բնական գործընկերներն են։ Ավելին, նշված տարածաշրջաններն ունեն բնական ռեսուրսներ, որոնք Չինաստանում բացակայում են, մինչդեռ Չինաստանն իր հերթին ունի առաջադեմ տեխնոլոգիաներ և արտադրություն։
Ըստ պրոֆեսորի Չինաստանը պատրաստ է անել ավելին, քան պարզապես ապրանքներ վաճառելը, նա նաև պատրաստ է ներմուծել տեխնոլոգիաներ և մարդկային կապիտալ։
«Հաշվի առնելով իր տարածքի և բնակչության փոքր չափերը Հայաստանը պետք է ընտրի տնտեսական համագործակցության ճիշտ ոլորտներ։ Ինչ վերաբերում է արհեստական բանականությանը, ապա դա լավ ընտրություն է։ Սակայն անհրաժեշտ են անխափան մատակարարման շղթաներ և զարգացած էկոհամակարգ։ Պետք է հաշվի առնել այնպիսի ուժեղ կողմերը, ինչպիսիք են մարդկային կապիտալը և բնական ռեսուրսները, հետևաբար, արհեստական բանականությունը դառնում է ակնհայտ ընտրություն։ Բոլոր այն երկրները, որտեղ հանքարդյունաբերությունը ավանդաբար եղել է առաջատար տնտեսական ոլորտ, պետք է դիտարկի դիվերսիֆիկացումը՝ ավանդականից կանաչ էներգիայի անցնելու առումով։ Հայաստանի համար դա նաև կարող է լինել տնտեսական զարգացման հիմնական բաղադրիչ»,- նկատել է Խեյվայ Թանը։
Ըստ նրա համաշխարհային տնտեսությունն այսօր բազմաթիվ հնարավորություններ է առաջարկում, որոնցից երկրները պետք է օգտվեն։ «Հայաստանն աշխարհագրորեն շատ լավ է դիրքավորված։ Հարավում Մերձավոր Արևելքն է, որը նույնպես օգտվել է աշխարհաքաղաքական փոփոխություններից, իսկ հյուսիսում Ռուսաստանն է, որը վերաուղղորդել է իր արտահանումը: Հայաստանը կարող է օգտվել դրանից հաշվի առնելով իր տաղանդավոր կադրերի առավելությունները, հատկապես տեղեկատվական տեխնոլոգիաների և արհեստական բանականության ոլորտներում»,- ասել է Խեյվայ Թանը:
