ՔՊ-ն կրկնօրինակում է նախկինների արատավոր բարքերը

Օրենքի գերակայությունից ու հավասարությունից խոսող «Քաղաքացիական պայմանագիր կուսակցությունը» և Նիկոլ Փաշինյանը շարունակում են օգտվել պաշտոնի ընձեռնած հնարավորություններից և բավականին խոշոր նվերներ են ստանում։ Խմբակցության ղեկավար Հայկ Կոնջորյանը, ըստ «Հետքի», տուն է գնել շուկայականից անհամեմատ էժան գնով։ Կառուցապատող ընկերությունը Կոնջարյանին տունը վաճառել է 21 միլիոն դրամով պակաս։ Իր հայտարարագրում քպականը նշել է, որ տունը գնել է հիփոթեքով 54 միլիոն դոլարով, մինչդեռ շինարարական ընկերությունից հետաքննող լրագրողին բոլորովին այլ թիվ են հասել՝ մոտ 75 միլիոն դրամ։

Կոնջորյանն այսօր արդարանում է, թե տունը գնել է կառուցապատման ընթացքում, և այդ ժամանակ անշարժ գույքի արժեքը շատ ավելի ցածր է եղել, քան կառուցման ավարտից հետո, մինչդեռ մինչ այդ «Հետքին» հրաժարվել է որևէ մեկնաբանություն անել։ Կոնջորյանի ասածն այս իմաստով որոշակիորեն տրամաբանական է, բայց այն, որ գործող իշխանությունները և նրանց տարբեր ներկայացուցիչներ, որ նախկինում նույնիսկ մեկ շիշ գարեջուր գնելու գումար չունեին, իշխանության գալուց հետո կարողանում են բավական բարձր արժեքով տներ, բնակարաններ, մեքենաներ ձեռք բերել, արդեն իսկ փաստ է։ Նրանց աշխատավարձերը որևէ կերպ չեն համապատասխանում իրենց կատարած ծախսերին։

Ի դեպ, նույն բանի մեջ մեղադրում էին նախկիններին, բայց թերևս կարելի է նշել, որ «Քաղաքացիական պայմանագիրը», եթե նախկիններին չի էլ գերազանցել, ապա առնվազն հետ չի մնում պաշտոնեական դիրքի չարաշահումներից, այն սեփական հարստացման համար օգտագործելուց։ Իսկ Փաշինյանի հռչակած 3 միլիոն վարչապետերը շարունակում են ապրել ծայրահեղ ծանր սոցիալական պայմաններում։ Փաստացի 2018 թվականի իշխանափոխությունը, որ գործող իշխանությունը «ոչ բռնի թավշյա հեղափոխություն» է անվանում, տեղի ունեցավ ընդամենը մեկ բանի համար, որպեսզի մի խումբ լավ ապրող մարդկանց փոխարինի մեկ այլ խումբ, որը ևս սկսի լավ ապրել, իսկ քաղաքացին որևէ դրական փոփոխություն իր կյանքում չի էլ տեսել։

Տաթևիկ Բադալյան