Փաշինյանը մնացել է Քի Վեսթի տակ

Արցախյան կարգավորման բանակցային գործընթացի վերաբերյալ փաստաթղթերի հրապարակումը և իշխանության հետագա արդարացումները վկայում են, որ Փաշինյանն ու իր թիմակիցները չեն կարողանում դուրս գալ իրենց արածի պատասխանատվության տակից։ Տարիներ շարունակ գործող իշխանությունները նախկիններին ու հատկապես Ռոբերտ Քոչարյանի իշխանությանը մեղադրել են Մեղրին հանձնելու, Քի Վեսթի փաստաթղթին համաձայնություն տալու մեջ, մինչդեռ հենց խորհրդարանում ինքը՝ Փաշինյանը, երեկ հայտարարել է, թե Հայաստանի կառավարության տիրապետության ներքո Քի Վեսթի փաստաթուղթ չկա։ Ու ընդդիմադիր պատգամավորի հարցին, թե ինչու կառավարությունը բանակցային գործընթացին վերաբերող փաստաթղթերը հրապարակելիս Քի Վեսթի փաստաթուղթը չի հրապարակել, Փաշինյանը տարօրինակ ու անհեթեթ մի պատասխան է տվել։

«Ես շատ մտածել եմ, թե ինչո՞ւ չկա, և իմ պատասխանը մեկն է՝ որովհետև դա նույնիսկ բանակցային լիարժեք փաստաթուղթ չի եղել, դա եղել է դավադրություն։ Եվ դա է պատճառը, որ էդ համատեքստում տեղի է ունեցել Հոկտեմբերի 27-ը և դրան նախորդած ու հաջորդած իրադարձությունները։ Ուրիշ բացատրություն չկա», - ասել է Փաշինյանը։ Ավելին, դիտարկմանը, թե Փաշինյանը չի հրապարակում այդ փաստաթուղթը, քանի որ դա իրեն ձեռք չի տալիս, որովհետև Քի Վեսթով Արցախը Լաչինի միջանցքով միանալու էր Հայաստանին, գործող վարչախմբի պարագլուխն ինքն է կոչ արել ընդդիմությանը հրապարակել դա, եթե ունեն Քի Վեսթի փաստաթուղթը։

Ըստ էության, տարիներ շարունակ իշխանության տարածած նարատիվները հօդս են ցնդում հենց իրենց իսկ ձեռքով և ապացուցում, որ փաշինյանական իշխանությունը ընդամենը Արցախի կարգավորման վերաբերյալ փաստաթղթերը, թեզերը, նարատիվները օգտագործել է զուտ ներքաղաքական քարոզչական նպատակներով, իսկ նախկին իշխանությունների դեմ նրանց արած հայտարարությունները ոչ այլ ինչ են, քան պարզագույն կեղծիք և մանիպուլյացիա։ Ըստ էության, հենց սա էլ բնորոշում է գործող իշխանությունների դավաճանական էությունը։

Նոնա Գալստյան