Պատերազմից հինգ տարի անց զոհվածների հստակ թիվը հայտնի չէ

Արցախյան 44-օրյա պատերազմից հետո մինչ օրս՝ 5 տարի, Հայաստանի գործող իշխանությունները հրաժարվում են հրապարակել պատերազմում զոհվածների անվանացանկը։ Նույնիսկ հրապարակված թվերը որևէ կերպ հանրության կասկածները չեն փարատում։

Կրկին այս հարցի շուրջ թեժ բանավեճեր սկսվեցին, երբ օրեր առաջ Ազգային ժողովի նախագահը ֆեյսբուքյան էջում գրառում կատարեց՝ հայտնելով, որ 44-օրյա պատերազմի հետևանքով հայկական կողմից եղել է 3833 զոհ, այդ թվում՝ 78 քաղաքացիական անձ։ Ազգային ժողովի նախագահի հայտարարած թվերը ակնհայտորեն տարբերվում են Փաշինյանի, ԱԺ հանձնաժողովի նախագահ Անդրանիկ Քոչարյանի և Քննչական կոմիտեի տարածած տեղեկություններից։ 2021 թվականի սեպտեմբերի 27-ին իշխանությունները հայտարարել են, որ պատերազմում ՀՀ քաղաքացիություն ունեցող զոհերի քանակը եղել է 3781, իսկ 283-ը համարվել են անհետ կորած։ Ընդ որում՝ ակնհայտ է, որ թե՛ Ազգային ժողովի նախագահը, թե՛ իշխանությունները Արցախի զոհված քաղաքացիների թիվը չեն նշել, իսկ դա բավականին լուրջ և մեծ թիվ է կազմում։

Արցախի ՄԻՊ Գեղամ Ստեփանյանի տվյալներով՝ պատերազմում 822 արցախցի է զոհվել։ Ազգային ժողովի նախագահը իր հայտարարությունը պարզաբանել է՝ նշելով, թե այդ թիվը հրապարակել է Քննչական կոմիտեի տվյալներից ելնելով։ Ավելին՝ ասել է, որ այդ թիվը կարող է փոխվել, որովհետև դեռ 191 անհետ կորած ունենք։

Ցանկացած պարագայում ակնհայտ է, որ Հայաստանի իշխանությունները պատերազմից 5 տարի անց էլ շարունակում են կիսատ տեղեկատվություն փոխանցել հանրությանը, իսկ դա առանց այն էլ ջղաձիգ նյարդերով հասարակության մոտ վստահության նոր ճգնաժամ է հարուցում։ Չհաշված, որ պատերազմի հանգամանքները քննող հանձնաժողովի զեկույցն էլ «բարով-խերով» կորցրին՝ այդպես էլ հանրությանը չհայտնելով, թե ինչ է տեղի ունեցել 44-օրյա պատերազմի ընթացքում։

Մարիամ Գալստյան