ՀՀ իշխանությունները միասնական դիրքորոշում չունե՞ն կարևոր հարցերում
ՎԵՐԼՈՒԾՈՒԹՅՈՒՆՆԵՐ
Այսօր Բիշքեկում մեկնարկել է ՀԱՊԿ գագաթնաժողովը, որին Հայաստանը, վերջին տարիներին ձևավորված «սովորույթի» համաձայն, չի մասնակցում, թեպետ ՌԴ նախագահի օգնական Յուրի Ուշակովը նշել էր, թե պաշտոնական Երևանը դեմ չէ գագաթնաժողովում համաձայնեցված փաստաթղթերի ընդունմանը։ ՀՀ փոխարտգործնախարար Մնացական Սաֆարյանը, երեկ պատասխանելով Հայաստանի՝ ՀԱՊԿ-ից դուրս գալու մասին հարցին, ասել էր, թե այդպիսի հարց այս փուլում Արտաքին գործերի նախարարության օրակարգում չկա։
«Մեր առջև այդպիսի խնդիր դեռ չի դրվել, և եթե լինեն այդպիսի զարգացումներ, կիմանաք բնականաբար դրա մասին», – նշել էր Սաֆարյանը: Հայաստանը վերջին 2 տարին հիմնականում չի մասնակցում ՀԱՊԿ-ի միջոցառումներին: Փոխարտգործնախարարն այսօր վերահաստատեց ՀԱՊԿ-ի հետ կապված Հայաստանի քաղաքականությունը. «Չենք մասնակցում, բայց չենք խոչընդոտում որոշումների, փաստաթղթերի ընդունմանը»:
Հաշվի առնելով ստեղծված իրավիճակը՝ ինչո՞ւ Հայաստանը դուրս չի գալիս այդ կառույցից, ո՞րն է պատճառը, որ շարունակում է մնալ ՀԱՊԿ-ում, արդյոք Երևանը մտավախություն ունի՞, որ իր այդ քայլով էլ ավելի կսրի Ռուսաստանի հետ ունեցած հարաբերությունները: Այս հարցերին ի պատասխան փոխարտգործնախարարն ասաց, թե «այս փուլում իրենց քաղաքականությունն այդպիսին է»։
ԱԺ նախագահը երեկ լրագրողների կողմից «հակառուսության» վերաբերյալ տարբեր մեղադրանքներին ի պատասխան զարմացած արձագանքել էր․ «ՀԱՊԿ-ից դուրս գալը հակառուսության մասի՞ն է խոսում: Եթե անդամագրվում ես մի կազմակերպության, ենթադրենք՝ Ժուռնալիստների միությանը, և այդ կազմակերպությունն իր պարտավորությունները չի կատարում, ու ուզում ես դուրս գալ դրանից, ուրեմն դու հակալրագրո՞ղ ես»:
Պատասխանելով հարցին, թե այդ դեպքում ինչո՞ւ Հայաստանը դուրս չի գալիս կառույցից՝ ԱԺ նախագահն ասել էր. «Փաստացի, դուրս եկած ենք: Ինչ վերաբերում է մնացածին, դա էլ թողեք մեր քաղաքական նպատակահարմարության և մեր բանակցությունների վրա»: Այս մի դրվագը հերթական անգամ վկայում է, որ ՀՀ իշխանությունները չունեն միասնական դիրքորոշում կարևորագույն հարցերում, և երկու տարբեր պաշտոնյա կարող են տարբեր դիրքորոշումներ հայտնել՝ իրարից հակոտնյա։ Հենց սա է կառավարման տոտալ ձախողումը, որը նաև միջազգային գործընկերների մոտ անհուսալի գործընկերոջ համբավ է ապահովում ՀՀ-ի համար։
Մարիամ Գալստյան
