Դպրոցներում «Օտար լեզու» առարկայի դասագրքերի ստեղծման գործընթացում կներգրավվեն այլ երկրների դեսպանատներ. նախագիծ. «Փաստ»

«Փաստ» օրաթերթը գրում է.

ԿԳՄՍ նախարարությունն առաջարկում է լրացումներ կատարել նախարարի 2022 թվականի հունիսի 9-ի N 20-Ն հրամանում։ Համաձայն «Հայաստանի կրթության մինչև 2030 թվականի զարգացման պետական ծրագրի», Հայաստանի կրթական համակարգի կարևոր ուղղություններից է բազմալեզու կրթության զարգացումը, միջազգային գործընկերների ներգրավումը և կրթական ռեսուրսների արդիականացումը։ Նախագծով առաջարկվող լրացումներն ուղղակիորեն նպաստում են այդ քաղաքականության իրականացմանը՝ ընդլայնելով դասագրքերի մշակման գործընկերային շրջանակը, ներգրավելով մեր երկրում գործող դեսպանատներին և ապահովելով դասագրքերի ստեղծման գործընթացի թափանցիկ և բազմաստիճան վերահսկողություն։

Նախագծով առաջարկվող լրացումներով՝ հանրակրթական ծրագրերում օգտագործվող «Օտար լեզու» առարկայի դասագրքերի ստեղծման գործընթացում ներգրավվում են այլ երկրի դեսպանատներ, որոնք համապատասխան լեզվի կրողներն են և ունեն լեզվական, մշակութային և կրթական բովանդակություն ապահովելու բարձր ներուժ։ Դեսպանատների ներգրավումը թույլ է տալիս ստեղծել ավելի որակյալ և ժամանակակից բովանդակություն՝ գիտական և մեթոդական բարձր ճշգրտությամբ։

Առաջարկվող լրացումները նպատակ ունեն կանոնակարգելու «Օտար լեզու» առարկայի դասագրքերի ստեղծման, բովանդակության փորձաքննության և ձևավորման գործընթացները միջազգային համագործակցության շրջանակում՝ ապահովելով դասագրքերի բարձրորակ, պետական չափանիշների պահպանում և գործընթացների թափանցիկություն։

Դեսպանատան կողմից ձևավորվող մասնագիտական հանձնաժողովի կողմից բովանդակության փորձաքննությունը հնարավորություն է տալիս ապահովել լեզվական, մշակութաբանական և մեթոդական ճիշտ և հավասարակշռված մոտեցում։

Գործող կարգավորումներով սահմանված է միայն պետական կառույցների ներգրավվածությունը, մինչդեռ օտար լեզվի դասագրքերի պարագայում որոշ բովանդակային հարցեր կարող են ավելի արդյունավետ գնահատվել լեզվի բնիկ մասնագետների կողմից։ Միևնույն ժամանակ, թեկուզև բովանդակային փորձաքննությունն իրականացվում է դեսպանատան հանձնաժողովի կողմից, դասագրքի տեխնիկական չափորոշիչները պետք է բացառապես համապատասխան լինեն Հայաստանի իրավական նորմերին: Տեխնիկական փորձաքննության իրականացումը ԿԶՆԱԿ-ի ներգրավմամբ և նրա կողմից ձևավորված հանձնաժողովի միջոցով թույլ է տալիս պահպանել պետական վերահսկողությունը դասագրքի վերջնական որակի նկատմամբ, ապահովել դասագրքի համապատասխանությունը Հայաստանի սահմանված պարտադիր պահանջներին, տարանջատել բովանդակային և տեխնիկական գնահատման գործառույթները՝ ապահովելով գործընթացի օբյեկտիվությունն ու արդյունավետությունը։

Նախարարության կողմից մրցույթի անցկացումն ապահովում է տեխնիկական և գեղարվեստական բարձր որակ, մասնագիտական մրցակցային դաշտի ստեղծում և բովանդակություն–ձևավորում ներդաշնակության պահպանում։ Սա կարևոր է հատկապես այն պայմաններում, երբ բովանդակության ստեղծումը և ձևավորումը իրականացվում են տարբեր սուբյեկտների կողմից։

Մանրամասները՝ «Փաստ» օրաթերթի այսօրվա համարում