Փաշինյանը հատել է բռնապետության սահմանները

Վաղ առավոտից Ազգային անվտանգության ծառայությունը ներխուժել է փոդքաստի հաղորդավարներ Նարեկ Սամսոնյանի և Վահագն Սաղաթելյանի տները, խուզարկություններ իրականացրել, ապա բերման ենթարկել։ Ըստ փաստաբանների՝ նրանց մեղադրում են խուլիգանության մեջ և դատարան են ներկայացրել կալանքի միջնորդություն։ Ավելին՝ ըստ նույն աղբյուրների, խուզարկություններ են իրականացվում նաև «Անտիֆեյք» լրատվականի շենքում՝ առգրավելով ամբողջ տեխնիկան։

Սամսոնյանի և Սաղաթելյանի դեմ հաղորդում է ներկայացրել Ազգային ժողովի նախագահը՝ հայտարարելով, որ նրանք, ովքեր խուլիգանություն կանեն կամ սպառնալիքներ կհնչեցնեն, օրենքով պատժվելու են։ ԱԺ նախագահը Վահագն Սաղաթելյանից պահանջում է 2 միլիոն դրամ փոխհատուցում, ինչպես նաև հրապարակային ներողություն՝ սոցցանցի անձնական էջում 5 աշխատանքային օրվա ընթացքում։

Երրորդ նախագահ Սերժ Սարգսյանի՝ 7 ժամ տևած հարցազրույցից հետո ակնհայտ էր, որ գործող իշխանությունները չեն մարսելու նախկինում արդեն իսկ կալանավորված Նարեկ Սամսոնյանի և Վահագն Սաղաթելյանի ակտիվությունը, հատկապես որ վերջիններս առանձնապես զգուշավոր չէին իրենց բառամթերքում և գործող իշխանությունների հասցեին հաճախ էին օգտագործում վիրավորական արտահայտություններ։

Բուն պատճառը, սակայն, ոչ թե հենց արված արտահայտություններն են, այլ Սերժ Սարգսյանի հետ հարցազրույցի լայն տարածումը, որը բավականին լրջորեն մտահոգել է գործող իշխանություններին։ Ուստի նրանք փորձում են մեկուսացնել հաղորդավարներին՝ առաջիկայում փոդքաստի գործունեությունը կաթվածահար անելու նպատակով։

Խորհրդարանական ընտրություններից առաջ ակտիվիստների նկատմամբ նման հետապնդումները վկայում են, որ իշխանությունները հատել են բռնապետության բոլոր սահմանները և վերարտադրվելու իրենց ջանքերում ոչնչի առջև կանգ չեն առնում։

Լիա Ստեփանյան