Փաշինյանը ցանկանում է ցանկացած գնով վերազավթել իշխանությունը Հայաստանում. «Փաստ»

«Փաստ» օրաթերթը գրում է.

bloknot.ru–ն «Փաշինյանը ցանկանում է ցանկացած գնով վերազավթել իշխանությունը Հայաստանում» վերնագրով հոդվածում գրում է, որ նոյեմբերի 6-ին Հայ առաքելական եկեղեցու հոգևորականությունը տագնապ է հնչեցրել: Ռուսաստանի և Նոր Նախիջևանի թեմի կայքում հայտնվել է հայտարարություն, նույնիսկ կոչ՝ դադարեցնելու «ՀՀ իշխանությունների հակասահմանադրական, աստվածամերժ, եկեղեցազավթողական և հակաեկեղեցական քաղաքականությունը»: Հոգևորականները համոզված են, որ երկրում սկսվել է հակազգային արշավ, որի նպատակն է վարկաբեկել Եկեղեցին և նրա պաշտպանությանը համար ոտքի կանգնածներին:

Եվ դատելով Հայաստանից եկող լուրերից՝ Եկեղեցու սպասավորները լիովին ճիշտ են իրենց նկատմամբ իշխանությունների կողմից, ի դեմս Փաշինյանի, իրականացվող լայնածավալ հակազգային արշավի մասին պնդումներում: Օրինակ՝ հոկտեմբերին տեղի է ունեցել Հովհաննավանքի սրբապիղծ զավթումը: Արագածոտնի մարզում գտնվող Հովհաննավանքի հոգևոր կենտրոնը զավթել է կարգալույծ դարձած նախկին քահանա, փաշինյանի «ձեռնասուն» Ստեփան Ասատրյանը: Եկեղեցու հայտարարության համաձայն, Ասատրյանը փոխել է վանքի դռների կողպեքները՝ արգելափակելով օրինական նշանակված հոգևորականների՝ Հայր Սարգիս Սարգսյանի և Հայր Մանուկ Զեյնալ յանի մուտքը: Եվ ոչ, դա պարզապես անարգված քահանայի կամայական գործողություն չէ, այդ սրբապղծությունը թույլատրվել է «վերևից»: Հոկտեմբերի 26-ին Ասատրյանը վանքում պատարագ է մատուցել, որին մասնակցել են Նիկոլ Փաշինյանը, կառավարության անդամներ և իշխող «Քաղաքացիական պայմանագիր» կուսակցության խորհրդարանական խմբակցության պատգամավորներ: Ոստիկանությունը շրջափակել է վանքի շրջակայքը, որ հավատացյալները իշխող վերնախավին չխանգարեն: Այսպիսով, ստացվում է, որ վանքի գրավումը Փաշինյանի ուղղակի հրամանն է։ Ակնհայտ է, թե ինչու է վարչապետին անհրաժեշտ վանքը։ Բանն այն է, որ Էջմիածնի գլխավոր հոգևոր կենտրոնի գրավումը մինչ օրս ձախողվել է, և նա պետք է ստեղծի իր սեփականը՝ իր վերահսկողության տակ։

Այո, Էջմիածին քաղաքն է դարձել Փաշինյանի՝ հոգևորականության դեմ պայքարի կիզակետը, քանի որ շուտով այնտեղ կանցկացվեն քաղաքապետի ընտրություններ։ Դա կարող է թվալ շատ տեղական իրադարձություն, բայց այն մեծ ուշադրություն է գրավել Հայաստանում և դրանից դուրս։ Փաստն այն է, որ ընտրությունները նաև դարձել են Փաշինյանի հակազգային արշավի մի մասը։ Էջմիածինը Հայ առաքելական եկեղեցու նստավայրն է։ Հաշվի առնելով այն, որ Փաշինյանը ցանկանում է ուժով ջախջախել ՀԱԵ-ն, քաղաքի վարչական վերահսկողությունը նրա համար կարևոր է։ Ավելին, փորձագետները նշում են, որ այդ ընտրությունները 2026 թվականի խորհրդարանական ընտրությունների գլխավոր փորձն են։ Իշխող «Քաղաքացիական պայմանագիր» կուսակցությունն արդեն ցույց է տվել իր դեմքը Էջմիածնի բնակիչներին։ Նախկին քաղաքապետ Դիանա Գասպարյանն էր հայտնվել կոռուպցիոն սկանդալի մեջ։ Եվ ոչ միայն նա, այլ նաև նրա ամբողջ ընտանիքը, որը «կախարդական հրաշքով» հայտնվել էր իշխանության դիրքերում: Օրինակ՝ նրա սկեսրայրն ու սկեսուրը մեղադրվել են քաղաքապետարանից վառելիք հափշտակելու, ինչպես նաև քաղաքում անօրինական շինարարության մեջ։ Սակայն «Քաղաքացիական պայմանագրին» չի անհանգստացնում այդ սկանդալը, և նա կրկին մասնակցում է ընտրություններին: Հիմա էլ մի թեկնածուով, որը նույնպես զուրկ է բարձր բարոյական արժեքներից: Հերոսի որդի Արգիշտի Մեխակյանն է դարձել իշխող կուսակցության թեկնածուն: Հայերի մեծամասնության համար դա իսկական հարված և դավաճանություն է: Փաստն այն է, որ այդ քաղաքական գործիչը երկրի ազգային հերոս Մեխակ Մեխակյանի որդին է, որը մասնակցել է Ղարաբաղյան պատերազմին և առաջիններից մեկն է պաշտպանել Արցախը կամավորների փոքր ջոկատով: Հիմա պարզվում է, որ ազգային հերոսի որդին ծառայում է ազգային դավաճանին, որը Ղարաբաղը հանձնեց Ադրբեջանին և այժմ կազմակերպում է բռնաճնշումներ այն Եկեղեցու և հավատքի դեմ, որի համար զոհվել է Մեխակ Մեխակյանը: Հայաստանում շատերը կարծում են, որ նման բարոյական սկզբունքներով քաղաքական գործիչը չպետք է լինի իշխանության մի քաղաքում, որը սրբազան է բոլոր հայերի համար:

Այն փաստը, որ կրտսեր Մեխակյանը պարզապես Փաշինյանի խաղաքարտն է, անվիճելի է։ Օրինակ՝ հայկական տելեգրամյան ալիքները հաղորդում են, որ նա իր ընտրարշավը սկսել է «հաղթաթղթերով»՝ կաշառակերությամբ և սպառնալիքներով։ Ավելին, Մեխակյանը, օգտագործելով իր պաշտոնական դիրքը, ճնշում է գործադրում պետական հատվածի աշխատակիցների վրա՝ ստիպելով դպրոցների տնօրեններին կազմել ընտրողների ցուցակներ և «ճիշտ քվեարկել»։ Շատ ընտրողներ չեն վստահում Մեխակյանին, նրա պաստառները պատռվել են փողոցներում, սակայն ամեն ինչ կորոշվի նոյեմբերի 16-ին։

Քաղաքապետի ընտրություններում Մեխակյանին կհակադրվի տարբեր քաղաքական ուժերի յոթ թեկնածու։ Մասնագետները նշում են, որ նրա հիմնական մրցակիցը Էջմիածնի ավագանու ընդդիմադիր խմբակցության ղեկավար Սևակ Խաչատրյանն է։

Նա ընկերացել է ՀՀ նախկին նախագահ Ռոբերտ Քոչարյանի կրտսեր որդու՝ Լևոն Քոչարյանի հետ և հետևողականորեն պաշտպանում է Հայ եկեղեցու շահերը։ «Մայր Հայաստան» դաշինքի ներկայացուցիչ Գրիշա Հարությունյանը նույնպես կարող է լուրջ մրցակից լինել։ Նա ևս հետևողականորեն պաշտպանում է հայերի հոգևոր և բարոյական շահերը և դեմ է Փաշինյանի կողմից Եկեղեցու նկատմամբ հալածանքներին։

Ընտրությունները տեղի կունենան նոյեմբերի 16-ին։ Ինչո՞ւ է Փաշինյանի համար այդքան կարևոր իր մարդուն նշանակել Էջմիածնում։ Շատերը կարծում են, որ հոգևոր կենտրոնի նկատմամբ վերահսկողությունը նրան թույլ կտա ամբողջությամբ ոչնչացնել Հայ առաքելական եկեղեցին։ Փաշինյանին սպասվում են կարևոր ընտրություններ, և նա պետք է հաղթի ցանկացած գնով, հակառակ դեպքում նրան անպայման կհիշեցնեն Արցախի նկատմամբ դավաճանության մասին։ Կրկնենք, որ իշխող «Քաղաքացիական պայմանագիր» կուսակցության թեկնածու Արգիշտի Մեխակյանը՝ ազգային հերոս Մեխակ Մեխակյանի որդին, փորձում է քաղաքապետ դառնալ վարչական լծակների և ընտրողների վրա ճնշումների միջոցով։

Մանրամասները՝ «Փաստ» օրաթերթի այսօրվա համարում