Ծանոթ ու միաժամանակ անհայտ … Գավի դեյ գավի գինի

Յուրաքանչյուր լավ գինի ունի իր ուշագրավ պատմությունը և գաղտնիքները յուրահատուկ համը ստանալու համար։ Դա նույնն է նաև Gavi dei Gavi-ի՝ Իտալիայի հպարտությունը հանդիսացող գինիների շարքի դեպքում։ La Scolca ընկերությունը ունի մոտ 60 տարի առաջ տնկված հին խաղողի այգիներ, որոնք ներկայումս տալիս են համեստ բերք. յուրաքանչյուր որթատունկի վրա աճում է ընդամենը 4-5 ողկույզ։ Սակայն հենց այդ խաղողի այգիներից է արտադրվում Gavi dei Gavi Etichetta Nera-ն՝ բաց դեղին գույնի գինին, որը վաճառվում է սև պիտակով թափանցիկ շշերով և Gavi շարքի ամենալավ ու ամենահայտնի արտադրանքն է։ Չնայած իր բարձր խտության բույրերին, դրա համը նուրբ ու արիստոկրատիկ է։ Այն նաև այդ շարքի միակ գինին է, որն ունի հասունացման ներուժ։ Այն հիանալի համադրվում է ցանկացած ուտեստի հետ, բայց հատկապես լավ է խեցգետնի, ծովախեցգետնի և մակարոնեղենի հետ։ Այն նաև հիանալի ապերիտիվ է։

Gavi-ի պատմությունը անբաժանելիորեն կապված է La Scolca կալվածքի և Սոլդատի ընտանիքի պատմության հետ։ Դեռևս 1919 թվականին է La Scolca-ն արտադրել իր առաջին մաքուր սպիտակ գինին Կորտեզ խաղողից։ 1966 թվականին Վիտտորիո Սոլդատին ստեղծել է Gavi dei Gavi Etichetta Nera ներդաշնակ համային փունջով գինին։ Այդ ժամանակվանից ի վեր այն միշտ պատրաստվել է լավագույն բերքի լավագույն խաղողից, հասունացվել է մառաններում մոտ տասը տարի ստեղծելով եզակի, ինտենսիվ և ազնիվ համ։

La Scolca-ն Պիեմոնտի Գավի շրջանի ամենահին գինեգործական կալվածքն է։ 1919 թվականին այն գնվել է Ջովամբատիստա Պարոդիի կողմից, ով շատ ժամանակ է նվիրել խաղողի այգիների բարելավմանը և գինեգործության նոր տեխնիկայի մշակմանը։ Այսօր նրա ժառանգները՝ Ջորջիո Սոլդատին և նրա դուստր Կիարան են ղեկավարում այն ընկերությունը, որը հաջողությամբ շարունակելով իրենց նախնիների ժառանգությունը, պահպանելով հին ավանդույթները միաժամանակ անթերի ներառել է ժամանակակից տեխնոլոգիաների վերջին նվաճումները։

Աշխարհի գինու քննադատները գովաբանում են Գավի դեյ գավի գինու համը։ Վերջին տարիներին այն մի քանի մրցանակների է արժանացել։ Օրինակ 2009 թվականին Gavi-ի սև պիտակը ներառվել է Wine Spectator-ի աշխարհի լավագույն գինիների ցանկում վաստակելով 88 միավոր։ 2011 թվականին այն արժանացել է բրոնզե մեդալի «International Wine Challenge» համտեսի մրցույթում, իսկ 2012 թվականին արծաթե մեդալի «China Wine Awards»-ում։

Ոմանք այս գինին անվանում են «մեր ժամանակների կիրքը»։ Դրա նուրբ համը գովաբանվել են այնպիսի հայտնիների կողմից, ինչպիսիք են Թոմ Քրուզը, Էլթոն Ջոնը, Բարաք Օբաման և Եղիսաբեթ II թագուհին։

Կ. Խաչիկյան