Փաշինյանը մերձավոր շրջապատի հետ քննարկում է արտահերթի հնարավորությունը

Հայաստանի վարչապետի պաշտոնը զբաղեցնող Նիկոլ Փաշինյանը վերջին օրերին բավականին լուրջ խորհրդակցություններ է անցկացնում իր ամենամերձավոր շրջապատի հետ՝ քննարկելով արտահերթ ընտրություններ անցկացնելու հնարավորությունները։ Մեր տեղեկություններով, Փաշինյանը լուրջ փաստարկներ է բերում, որ եթե արտահերթ ընտրությունների գնա, ապա բավականին լայն առավելություններ կարող է ստանալ։

Միակ մտավախությունը, որ ունի Փաշինյանը, Ռուսաստանի կողմից բխող ռիսկերի գնահատումն է։ Մոսկվայից կտրուկ քայլեր չեն արվում. երբեմն նույնիսկ շփվում են Փաշինյանի հետ, թեև տարբեր գագաթնաժողովներում Լուկաշենկոյի կամ այլ պաշտոնյաների բերանով նրան ծաղրում են։ Այնուամենայնիվ, կտրուկ գործողություններ չեն իրականացվում։ Փաշինյանը, միևնույն ժամանակ, Ռուսաստանին թշնամի երկիր է համարում, սակայն հասկանում է, որ Միացյալ Նահանգները դեռևս տարածաշրջանում ակտիվորեն ներկայացված չէ, եվրոպացիներն էլ գետնի վրա գործնական դեր չունեն, և միակ բանը, որ կարող են անել, Փաշինյանի ապօրինությունների նկատմամբ աչք փակելն է։

Մնում են միայն Թուրքիան և Ադրբեջանը, որոնք ևս երաշխիքներ չունեն, որ Փաշինյանը կկարողանա բարեհաջող անցնել արտահերթ ընտրությունների փուլը։ Որևէ կերպ Փաշինյանի վարկանիշը չի բարձրացնելու նաև խաղաղության պայմանագիրը, որքան էլ նա փորձի շահարկել խաղաղության իր խոսույթը։ Մայիսին անցկացվելիք Եվրոպական քաղաքական համայնքի գագաթնաժողովը, որին բազմաթիվ եվրոպական առաջնորդներ են մասնակցելու, մեծ հաշվով որևէ դիվիդենտ չի փոխանցի Նիկոլ Փաշինյանին։ Արդյունքում նա այժմ խորը տվայտանքների մեջ է՝ գնա՞լ արտահերթ ընտրությունների, թե՞ ոչ։

Ալլա Գևորգյան