Քննիչ հանձնաժողովի անփառունակ վախճանը, կամ ինչպե՞ս ձախողել զեկույցը

44-օրյա պատերազմի պատճառների մասին ԱԺ քննիչ հանձնաժողովի զեկույցը հանրությանը հասանելի չի լինի։ ԱԺ նախագահ Ալեն Սիմոնյանը, որն ավելի վաղ հայտարարել էր, թե զեկույցը քննարկելու են փակ նիստում, այժմ էլ որոշել է այն ուղարկել Ազգային ժողովի գաղտնի փաստաթղթերի բաժին։ Փաստաթղթին ծանոթանալու հնարավորություն կունենան պատգամավորները, այն էլ՝ ոչ բոլորը։ Քննիչ հանձնաժողովը դեռ մեկուկես տարի առաջ էր ավարտել զեկույցը, բայց Անդրանիկ Քոչարյանը համառորեն հրաժարվում էր այն ներկայացնել խորհրդարանին։ Զեկույցը խորհրդարանի նախագահությանը հանձնվել է այս տարվա սեպտեմբերի 3-ին։ Ալեն Սիմոնյանն էլ հայտարարել էր, թե Քոչարյանը խախտել է օրենքով սահմանված բոլոր ժամկետները։

Քոչարյանը, ով միտումնավոր էր ձգձգել զեկույցի հրապարակումը, որպեսզի խափանի իրեն հանձնաժողովի նախագահի պաշտոնից զրկելու ՔՊ-ականների ծրագրերը, դեբոշներ էր սարքում՝ պահանջելով զեկույցը քննել լիագումար նիստում, բայց ապարդյուն։ «Եթե լիագումար չի մտնում, ինքը առկախված է մնում, եթե մտնում է, նշանակում է՝ զեկույցը գոյություն ունի, և օրենքի պահանջն է՝ սահմանադրական օրենքի, որ զեկույցը այդ դեպքում պետք է լիագումարում զեկուցվի։ Եթե այլ տարբերակով է գնում, նշանակում է՝ զեկույցը գոյություն չունի», - օրերս ասել էր Քոչարյանը։

Հիմա էլ ՔՊ-ն իր հաստիքային քարոզիչների միջոցով փորձում է տպավորություն ստեղծել, իբր այդ զեկույցում այնպիսի աղաղակող փաստեր կան, որ դրա հրապարակումը կարող է վնասել ազգային անվտանգությանը, ՌԴ-ի հետ հարաբերություններին, ուստի չեն հրապարակում։ Թերևս առավել արժանահավատ է ընդդիմադիր պատգամավորների գնահատականը, թե ԱԺ նախագահի որոշումը իրականում այդ փաստաթղթի անփառունակ վախճանն է։ Ըստ էության, «Քաղաքացիական պայմանագիրը» մնացել է իր իսկ արածի ու սեփական պատգամավորների անգրագիտության և դիլետանտության տակ, այժմ էլ փորձում է խուսանավել։ Ամեն դեպքում՝ հրապարակվեր այդ զեկույցը, թե ոչ, Հայաստանում յուրաքանչյուրը գիտի, որ 44-օրյա պատերազմի միակ պատասխանատուն ու մեղավորը Նիկոլ Փաշինյանն է՝ իր թիմի հետ։

Էլեն Հունանյան