ՀԷՑ-ի շուրջ քաղաքական հաշվեհարդարն ու ներդրումային վտանգները

Հայաստանի էլեկտրական ցանցերի շուրջ առաջացած լարվածությունն արդեն վաղուց դուրս է եկել տնտեսության ոլորտից և դարձել քաղաքական հաշվեհարդարի գործիք։ ՀԷՑ-ի նախկին գլխավոր տնօրենի տեղակալ Դավիթ Ղազինյանը բաց ու թափանցիկ բանավեճ է առաջարկել ժամանակավոր կառավարման թիմի հետ՝ ընդգծելով, որ հասարակությունը պետք է լսի բոլոր կողմերի փաստարկները։ Նրա խոսքով՝ ոչ մի միջազգային ներդրող չի համաձայնի կառավարել այնպիսի ակտիվ, որն արդեն մեկ անգամ բռնագրավվել է իր օրինական սեփականատիրոջից․ նման նախադեպը վանում է ցանկացած լուրջ ներդրողի։

Իշխանությունների վարած այս քաղաքականությունը ոչ միայն խորացնում է ներքաղաքական ճգնաժամը, այլ նաև կտրում է Հայաստանի ներդրումային ապագայի ճանապարհը։ Ամերիկացի փաստաբան Ռոբերտ Ամստերդամն իր վերջին հայտարարությունում նշել է, որ ՀԷՑ-ի գործը կարող է դառնալ նախադեպ, որը կվախեցնի օտարերկրյա բիզնեսին և կսպառի երկրի ներդրումային բազան։

Ավելին՝ հայտնի փաստաբան, նախկին պատգամավոր Արամ Վարդևանյանը Սամվել Կարապետյանի նկատմամբ հարուցված գործը բնորոշել է որպես «քաղաքական հետապնդում և տոտալ անգործություն՝ ապօրինի կալանքը պահպանելու նպատակով»։

Այս ամենի հետևանքով ՀԷՑ-ի շուրջ ծավալվող պատմությունը վտանգում է ոչ միայն մեկ ընկերության ճակատագիրը, այլև Հայաստանի տնտեսությանն անհրաժեշտ վստահության միջավայրը։ Վախի և անորոշության մթնոլորտում ոչ մի լուրջ ներդրող չի գա Հայաստան, իսկ դա նշանակում է նոր հարված երկրի զարգացման հեռանկարներին։