Փաշինյանի սիրտը մոլդովական ուղի է ուզում

Մոլդովայում տեղի ունեցած ընտրությունները հերթական անգամ ոգևորել են հայաստանյան արևմտամետներին, ինչպես նաև ապացուցել, որ Ռուսաստանի քաղաքականությունը հետխորհրդային տարածքում որոշակիորեն անարդյունավետ է։ Նշենք, որ երեկ Մոլդովայի նախագահ, եվրոպամետ Մայա Սանդուի «Գործողություն և համերաշխություն» կուսակցությունը հաղթել է խորհրդարանական ընտրություններում՝ երկու անգամ շատ ձայն հավաքելով ռուսամետ «Հայրենասիրական դաշինքից»։ Ընդհանուր առմամբ Սանդուի կուսակցությունը հավաքել է 50 % ձայն և նախնական տվյալներով 101 հոգանոց խորհրդարանում կունենա 55 մանդատ։

Մոլդովայի նախագահը ընտրությունները վերածել էր արևմտամետներ–ռուսամետներ դիմակայության, երկիրը հասցրել ծայրահեղ բևեռացվածության՝ Մոսկվային մեղադրելով հիբրիդային պատերազմ վարելու մեջ, կարողացել համախմբել իր կողմնակիցներին, և այժմ, որքան էլ նախկին նախագահ Դոդոնն ու իր կողմնակիցները փորձեն բողոքի ցույցերով փոխել իրավիճակը, Եվրամիությունը, բնականաբար, լինելու է Սանդուի կողքին և նրա անցկացրած ընտրությունները գնահատելու է որպես ազատ և արդար։

Հայաստանյան իշխանությունները չեն էլ թաքցնում, որ փորձում են գնալ Մոլդովայի ճանապարհով։ Երեկվանից տեղական արևմտամետների ոգևորությանը չափ ու սահման չկա, իսկ ԵԱՏՄ և ԱՊՀ անդամ Հայաստանի վարչապետ Նիկոլ Փաշինյանը սոցիալական ցանցերում շնորհավորել է Մայա Սանդուին։ «Ջերմորեն շնորհավորում եմ Մայա Սանդուին և Մոլդովայի ժողովրդին խորհրդարանական ընտրությունների արդյունքների և երկրի եվրոպական ապագան առաջ մղելու նրա անսասան հանձնառության կապակցությամբ», - ոչ բազմանշանակ գրել է Փաշինյանը։

Նա այս կերպ փաստել է, որ դեպի Եվրոպա ընթանալու իր ուղին ևս ոչ պակաս անսասան է, իսկ դրա համար ունի ընդամենը մեկ տարբերակ՝ ծայրահեղ բևեռացվածության բերել հայ հանրությանը, առաջ մղել իր ձախողված խաղաղության օրակարգը, փորձել զավթել իշխանությունը։

Բնականաբար, Հայաստանում այս ամենը շատ ավելի բարդ է լինելու, որովհետև, եթե կան էլ ընդգծված արևմտամետ ուժեր և գործիչներ, ապա ընդգծված ռուսամետ ուժերը չափազանց քիչ են և որևէ կշիռ չեն ներկայացնում։ Սակայն կան բավականին լուրջ ընդդիմադիր միավորներ, որոնք համախմբելու դեպքում կարող են փոխել իրավիճակը ոչ ի օգուտ Փաշինյանի։

Աննա Կիրակոսյան