ԱՆԻՖ-ի անիվը թարս է շրջվելու Փաշինյանի համար
ՎԵՐԼՈՒԾՈՒԹՅՈՒՆՆԵՐ
Փաշինյանական իշխանության խոշորագույն ձախողումներից մեկը սպառնում է բավականին լուրջ սկանդալի վերածվել, քանի որ քրեական հետապնդման ենթարկվող անձինք բոլորովին չեն ցանկանում դառնալ Նիկոլ Փաշինյանի քավության նոխազները։ Հիշեցնենք՝ լուծարված ԱՆԻՖ հիմնադրամը, որտեղ ահռելի միջոցներ էին մսխվել և այն դարձել էր փաշինյանական կոռուպցիայի առանցքային դրսևորումներից մեկը, արդեն երկար տարիներ լրջագույն մտահոգություններ է հարուցում։ Իսկ ԱՆԻՖ-ի նախկին ղեկավարին և մի քանի այլ աշխատակիցների քրեական հետապնդման են ենթարկում փաստաթղթերի կեղծման, տեղեկատվական տեխնոլոգիաների կիրառմամբ հափշտակության և փողերի լվացման գործով։
ԱՆԻՖ-ի նախկին ղեկավար, ներկայումս քրեական հետապնդման ենթարկվող Դավիթ Փափազյանը ֆեյսբուքյան իր էջում գրել է, թե Նիկոլ Փաշինյանին սպասում է հերթական ձախողումը։ «Չի հաջողվելու մեզ մեղավոր կարգել իր և իր կառավարության խայտառակ սխալների և թերությունների համար, որոնք խափանեցին ԱՆԻՖ-ի հիմնադիր թիմի մշակած ծրագրերից մի քանիսը»,- հայտարարել է Փափազյանը։ ԱՆԻՖ հիմնադրամը ստեղծվել էր 2019 թ․-ին և ֆինանսավորվում էր պետական միջոցներով՝ տնտեսական բարեփոխումներին նպաստելու համար։ Հիմնադրամի կառավարման համար ներգրավել են մասնավոր մասնագետներ, այդ թվում՝ արտերկրից։ Ըստ մամուլի, միջոցների զգալի մասն ուղղվել է կասկածելի հեղինակություն և օֆշորային գրանցում ունեցող ընկերություններին։
Մի քանի միլիոն դոլար պարզապես փոշիացվել էր, իսկ հիմնական նախագծերը կամ ժամկետներից դուրս են եկել, կամ էլ, օրինակ, «Ֆլայ Արնա» ավիաընկերությունը փակվել էր 2024 թվականի հունվարին՝ գոյություն ունենալով ընդամենը երեք տարի։ Դրանից հետո իշխանությունները տևական ժամանակ փորձում էին ծածկադմփոց անել ԱՆԻՖ-ի շուրջ սկանդալը։ Եվ, ի վերջո, միայն վերջերս քրեական գործ հարուցվեց Փափազյանի և մի շարք այլ անձանց դեմ։
Ըստ երևույթին, Դավիթ Փափազյանը բոլորովին ցանկություն չունի դառնալ Նիկոլ Փաշինյանի քավության նոխազը և զգուշացնում է, որ իր դեմ գործողություններ կատարելու դեպքում բավականին լուրջ հակահարված է տալու։ Թե ինչով կպատասխանի կոռուպցիոն սկանդալների մեջ թաթախված իշխանությունը՝ դեռևս հայտնի չէ։
Անի Մարտիրոսյան
