Փաշինյանը կուսակիցներին հորդորել է հանդարտվել

Երեկ տեղի է ունեցել «Քաղաքացիական պայմանագիր» կուսակցության նախաձեռնող խմբի նիստ, որը վարել է Նիկոլ Փաշինյանը։ Ըստ ՔՊ պաշտոնական հաղորդագրության՝ քննարկվել են կուսակցության 7-րդ համաժողովի օրակարգին առնչվող հարցեր։ Մեր տեղեկություններով, սակայն, քննարկել են նաև Ալեն Սիմոնյան–Հայկ Սարգսյան ընդհարումը, որը բավական լուրջ հետևանքներ է ունեցել։ Փաշինյանը նիստում զայրացել է, կուսակիցներին հորդորել է հանդարտվել, առնվազն մինչև խորհրդարանական ընտրություններ իրար վրա «բոչկա» չգլորել։ Բայցևայնպես հայտնի է դարձել, որ Փաշինյանը զայրացած է Հայկ Սարգսյանի վարքից և կարծում է, թե նա է ԶԼՄ-ներին արտահոսք կազմակերպել տեղի ունեցածի մասին։

Հիշեցնենք, Ալեն Սիմոնյանի դիմումի հիման վրա պատգամավոր, «Շիշ բռնող» մականունով Հայկ Սարգսյանի նկատմամբ հարուցվել էր կարգապահական վարույթ, որի արդյունքում վերջինիս հայտարարվել էր խիստ նկատողություն։ Զուգահեռ, Հայկ Սարգսյանը նույնպես դիմում էր ներկայացրել Ալեն Սիմոնյանի նկատմամբ կարգապահական վարույթ հարուցելու համար։ Կուսակցության վերահսկող հանձնաժողովը Ալեն Սիմոնյանի նկատմամբ կարգապահական վարույթ հարուցելու հիմքեր չէր հայտնաբերել։

Մեր տեղեկություններով, Հայկ Սարգսյանը գրավոր պահանջ էր ներկայացրել, որպեսզի Ալեն Սիմոնյանին հեռացնեն կուսակցությունից։ Իր դիմումում Սարգսյանը պատճառաբանել էր, որ երբ ինքը օրենքի նախագիծ էր գրել բուքմեյքերական ընկերությունների հարկերը բարձրացնելու համար, Ալեն Սիմոնյանը ջղայնացել էր, քանի որ խաղադրույք ընդունող ընկերությունից ֆինանսական շահ ուներ։

Կառավարությունում երեկ լրագրողների հետ ճեպազրույցում Փաշինյանը հայտարարել էր, թե ՔՊ-ում արշալույսները խաղաղ են, կուսակցությունն ապրում է իր բնականոն կյանքով։ ««Քաղաքացիական պայմանագիր» կուսակցությունում արշալույսները միշտ խաղաղ են, բայց այդ խաղաղությունը երբեք չի եղել ճահճային։ Եթե դուք մասնակցեիք կուսակցության քննարկումներին, կտեսնեիք, որ դրանք միշտ տեղի են ունենում բուռն, սուր քաղաքական բանավեճի մթնոլորտում։ Ցավոք, լինում են դեպքեր, որ բանավեճի ընթացքում թույլատրելիի սահմանները անցնում ենք, այդ թվում նաև ես։ Այդպիսի դեպքերում գործում են կարգապահական գործընթացները»,– ասել էր նա՝ փորձելով ներկուսակցական ժողովրդավարության մասին հեքիաթներով ցրել տհաճ տպավորությունը։ Միաժամանակ նշել էր, որ եթե ի հայտ գան նոր հանգամանքներ, որևէ խոչընդոտ չկա, որ այդ թեմային կրկին անդրադառնան։

Մերի Եսայան