Լուրջ անհանգստություններ էլեկտրաէներգետիկ համակարգում. «Փաստ»

«Փաստ» օրաթերթը գրում է.

Մեր ունեցած տեղեկություններով, ՀՀ ամբողջ էլեկտրաէներգետիկ համակարգում լուրջ անհանգստության ալիք է բարձրացել, որը կապված է ՀԷՑ-ում տեղի ունեցող իրադարձությունների հետ: Նախ՝ համակարգի ընկերություննների սեփականատերերը խիստ ան հանգստացածեն օրենսդրական վերջին փոփոխություններից, որոնց արդյունքում սկսեց իրականացվել ՀԷՑ-ը խլելու գործընթացը: Լուրջ մտահոգություն է առաջացնում հատկապես այն հանգամանքը, որ, ըստ այդ օրենսդրական կարգավորումների, իշխանությունը կարող է ցանկացած մտացածին պատճառով «եզրակացնել», որ այս կամ այն ընկերությունում «կառավարման ճգնաժամ» է, և ժամանակավոր կառավարիչ նշանակելով՝ խլել ընկերությունը:

Էներգետիկ համակարգում գործունեություն իրականացնող ընկերությունների սեփականատերերը, բավականին քաջատեղյակ լինելով էլեկտրաէներգետիկ համակարգի խնդիրներին, արձանագրել են, որ իշխանությունների ասածները ո՛չ «կառավարման ճգնաժամի» հետ կապ ունեն, ո՛չ էլ իրավաբանության հետ, այլ ընդամենը ապագա ընտրողների համար ականջահաճո ձևակերպումներ, մեծ թվեր ու իբր «թալանի փաստեր» հրապարակելու միջոցով իշխանությունը փորձում է գեներացնել «ճգնաժամի» պատկերը: Ավելին, «կառավարման ճգնաժամը հիմնավորող փաստերից» մի քանիսն ուղղակի ապշեցրել են, խոսքը մասնավորաբար ՀԷՑ-ի վարկային գծեր ու վարկեր ունենալու կամ պլանային անջատումների քանակը նվազագույնի հասցնելու վերաբերյալ արված հայտարարությունների մասին է, որոնք, ըստ մասնագետների, մեղմ ասած, աբսուրդ են: Ավելին, էլեկտրաէներգետիկ համակարգի ընկերությունների սեփականատերերը վստահ են, որ հարմար պահին իշխանությունն այս նույն ձևով կարող է խլել համակարգի ցանկացած ընկերություն՝ սկսած «Գազպրոմ Արմենիայից» մինչև փոքր հիդրոէլեկտրակայաններ:

Մեկ այլ խնդիր էլ կա, որ լուրջ անհանգստությունների տեղիք է տալիս: Խոսքը ՀԾԿՀ նախագահ Մեսրոպ Մեսրոպյանի մասին է, որը, առանց խորանալու կատարվողի հետևանքների մեջ, անձնապես ստանձնել է այս՝ պետության և էլեկտրաէներգետիկ համակարգի համար քայքայիչ ազդեցություն ունեցող գործընթացի պատասխանատվությունը: Սեփականատերերը տարակուսում են, թե ինչպես կարող է որևէ մեկը նման քայքայիչ պատասխանատվություն ստանձնել, եթե նույնիսկ այդ ամբողջ գործընթացը սահմանվել է օրենքով, որն, իմիջիայլոց, ՍԴ-ում վիճարկման փուլում է (օրերս այդ օրենքի վիճարկումը ՍԴ-ում վարույթ է ընդունվել), և առկա են Ստոկհոլմյան արբիտրաժի ու նույնիսկ ՀՀ կառավարության անունից ուղարկված պաշտոնական կարծիքները, որ պետք է կասեցվի ՀԷՑ-ի նկատմամբ իրականացվող գործընթացը: Համենայն դեպս, մինչ օրս վերջին կարծիքը պաշտոնապես չի փոփոխվել՝ անկախ այն հանգամանքից՝ նման եզրակացություն տվողը պաշտոնանկ է արվել, թե ոչ:

Մանրամասները՝ «Փաստ» օրաթերթի այսօրվա համարում