Հերթական սրբապղծությունը, վանդալիզմ են իրականացրել 4-օրյա երեխայի գերեզմանին․ Shamshyan

Երեկ՝ օգոստոսի 30-ին, հերթական սրբապղծության դեպքն է տեղի ունեցել Արարատի մարզում։ Գետառատ բնակավայրի բնակիչները, այցելելով գյուղի գերեզմանատուն, հայտնաբերել են, որ ստահակը կամ ստահակները հերթական անգամ սրբապղծություն են իրականացրել այս տարի մահացած 4-օրյա աղջնակի շիրիմի նկատմամբ։

Ֆոտոլրագրող Գագիկ Շամշյանի հետ զրույցում հարազատները իրենց զայրույթն էին արտահայտում կատարվածի համար ու ասում էին․ «Մարդ ի՞նչ աստիճանի թուրքից բեթար լինի, որ ձեռքը գնա ու երկրորդ անգամ նման սրբապղծություն ու վանդալիզմ իրականացնի։
4-օրյա աղջկան հուղարկավորել ենք էստեղ ու պատրաստվում էինք նաև քար դնեինք, բայց հունիսին հերթական անգամ այցելեցինք շիրիմին ու տեսանք, որ երեխայի անունով հուշատախտակը չկա, ման եկանք ու հայտնաբերեցինք մի քանի գերեզման այն կողմ՝ ջարդած։

Մտածեցինք աղմուկ չբարձրացնենք, երևի ինչ-որ մեկը հիմարություն է արել ու նոր հուշատախտակ պատվիրեցինք, տեղադրեցինք, հինն էլ թողեցինք գերեզմանի մոտ։ Երեկ եկանք երեխայի շիրիմին ու մնացինք ապշած, քանի որ այն կոտրել էին, ինչը արդեն մեզ մոտ լուրջ կասկած է հարուցել, որ միտումնավոր են անում։

Ամբողջ գյուղով, ով իմացավ այս մասին, զայրացած են։

Բոլորս ոչ միայն դատապարտում ենք կատարվածը, այլ նաև ուզում ենք հավատալ, որ Արտաշատի ոստիկանությունը կհայտնաբերի այդ տականքին կամ տականքներին, ովքեր նման զազրելի քայլի են դիմել։

Ճիշտն ասած, այդքան էլ հույս չունենք, որ իրավապահները կհայտնաբերեն։

Հիմա ի՞նչ անենք, ամբողջ գիշեր հո հերթապահություն չենք իրականացնելու էստեղ։ Իրավապահները պետք է անհապաղ միջոցներ ձեռնարկեն ու հայտնաբերեն այդ ոչնչություններին»։

Ֆոտոլրագրողը հայտնում է, որ դեպքի մասին արդեն տեղյակ են ՀՀ Ներքին գործերի նախարարության ոստիկանության համայնքային ոստիկանության Արտաշատի բաժնում։ Մնում է, որ ցուցաբերեն սրտացավ մոտեցում և դեպքը բացահայտեն։