Իսպանիան հայտնել է, որ անտառային հրդեհները գրեթե մարել է

Իսպանիան գրեթե հաղթահարել է անտառային հրդեհները, որոնք այս ամիս ընդգրկել էին ամբողջ երկիրը և խլել չորս մարդու կյանք։ Այս մասին շաբաթ օրը հայտնել է քաղաքացիական պաշտպանության և արտակարգ իրավիճակների ծառայության ղեկավար Վիրխինիա Բարկոնեսը։

«Դրանք գնալով քչանում են, և ավարտը շատ ավելի մոտ է»,- պետական TVE հեռուստաալիքին տված հարցազրույցում ասել է Վիրխինիա Բարկոնեսը։

Սակայն, ըստ նրա, մնացած օջախները դեռևս շատ «նենգ» են, և «վերջին ճիգ կպահանջվի՝ վերջ դնելու այս սարսափելի իրավիճակին»։

Ըստ Անտառային հրդեհների մասին եվրոպական տեղեկատվական համակարգի, իսպանացի հրշեջները, որոնց օգնում են ԵՄ այլ երկրներ, շաբաթներ շարունակ պայքարել են կրակի դեմ, որը վերջին երկու շաբաթվա ընթացքում ընդգրկել է ավելի քան 350 000 հեկտար տարածք։

Ամենաշատը տուժել են հյուսիսային և արևմտյան շրջանները՝ Կաստիլիա և Լեոնը, Էստրեմադուրան և Գալիսիան։ Անտառային հրդեհները բռնկվել են սաստիկ շոգերի ժամանակ, որոնք երկրում պահպանվել են երկու շաբաթ շարունակ, ինչի հետևանքով ջերմաստիճանը հասել է 40 աստիճան Ցելսիուսի և ավելի։ Հրդեհների հետ կապված արտակարգ իրավիճակը ուշադրություն է հրավիրել ոչ միայն կլիմայի փոփոխության, այլև այն միտումների վրա, որոնք խոցելի են դարձրել Իսպանիայի գյուղական վայրերը։ Կաստիլիա և Լեոնը տասնամյակներ շարունակ տուժում է գյուղական վայրերից զանգվածային արտահոսքից, բնակչության ծերացումից, գյուղատնտեսության և անասնապահության անկումից, որոնք ժամանակին օգնում էին անտառները մաքուր պահել։ Ուժեղ քամիները, որոնք շաբաթներ շարունակ տարածում էին կրակը, վերջերս թուլացել են։

Բարկոնեսը հայտնել է, որ երկրում դեռևս կա 18 ակտիվ անտառային հրդեհ, և բոլորը, բացի մեկից, դասակարգված են 2-րդ գործառնական մակարդակով, ինչը նշանակում է, որ դրանք վտանգ են ներկայացնում մարդկանց և գույքի համար։ Նա ասել է, որ իրեն հատկապես անհանգստացնում է Կաստիլիա և Լեոնի հյուսիս-արևմուտքում գտնվող Իգուենյայի հրդեհը։