Netflix-ը չի երկարաձգի արքայազն Հարրիի և Մեգան Մարքլի հետ կնքված 100 միլիոն դոլարանոց պայմանագիրը

Netflix-ը որոշել է չերկարաձգել արքայազն Հարրիի և Մեգան Մարքլի հետ կնքված 100 միլիոն դոլար արժողությամբ պայմանագիրը։ Զույգը պայմանագիր էր ստորագրել 2020 թվականին՝ հինգ տարով։ Այդ ընթացքում նրանք նկարահանել էին մի քանի Netflix-ի նախագծերում: Նրանց ամենահայտնի նախագիծը՝ «Հարրին և Մեգանը» վավերագրական սերիալը, թողարկվել էր 2022 թվականին և ունեցել էր մեծ հաջողություն՝ հավաքելով 64 միլիոն դիտում։ Սակայն վերջին նախագծերը՝ արքայազն Հարրիի մասին «Polo» սերիալը, որը թողարկվել էր 2024 թվականին, ունեցել է ընդամենը 500,000 դիտում, իսկ Մեգան Մարքլի «With Love, Meghan» կենսակերպի շոուն նույնպես չի ունեցել մեծ արձագանք։

People ամսագրի տվյալներով՝ զույգի պայմանագիրը չի երկարաձգվի։ Այս լուրը հայտնվեց այն բանից հետո, երբ The Sun-ը հաղորդեց, որ «պայմանագիրը ավարտված է, այլևս նոր շոուներ չեն ստեղծվի»։ Աղբյուրները նշում են, որ երկու կողմն էլ թշնամանք չունեն, պարզապես համագործակցությունը հասել է իր ավարտին։ Աղբյուրը հավելել է, որ Netflix-ը ստացել է այն, ինչ կարող էր զույգից. առաջին վավերագրական սերիալը մեծ հաջողություն ունեցավ, բայց դրանից հետո բովանդակությունը թուլացավ։ Այնուամենայնիվ, Netflix-ը գոհ է, քանի որ ստացել է մեծ դիտումներ և ստեղծել է ամենաշատ քննարկվող շոուներից մեկը։

Հաղորդվում է նաև, որ Netflix-ի ղեկավարները գիտակցում էին, որ Մեգան Մարքլի առաջնահերթությունը հիմա իր սեփական բրենդն է, և հարթակը չէր ցանկանում երկրորդ պլանում լինել։ Աղբյուրը նշել է, որ պաշտոնական հայտարարություն չի լինի, բայց եթե ապագայում ինչ-որ բան փոխվի, հնարավոր է մեկանգամյա նախագիծ։ Սակայն հատկապես արքայազն Հարրիի համար սա ֆինանսական մեծ կորուստ է։

Նշենք, որ այս տարվա սկզբին Մեգան Մարքլի խոհարարական ծրագիրը լայնորեն քննադատվել էր սոցիալական ցանցերում: