Ծանոթ ու միաժամանակ անհայտ … «Գլորիա Ջինս» ընկերություն

Ռուսական նորաձևության արդյունաբերության առաջատարներից մեկը Gloria Jeans ապրանքանիշն է: Ավելի քան 30 տարի այն արտադրում է նորաձև հագուստ երեխաների և մեծահասակների համար: Ընկերությունը Ռուսաստանի ամենամեծ մասնավոր ձեռնարկություններից մեկն է:

Իսկ ո՞վ և երբ է հիմնադրել «Գլորիա Ջինս» ընկերությունը: «Գլորիա Ջինս»-ի պատմությունը սկսվել է 1988 թվականին, երբ ԽՍՀՄ-ում ընդունվեց «Կոոպերացիայի մասին» օրենքը։ Այն թույլ էր տալիս ունենալ սեփական բիզնես և Վլադիմիր Մելնիկովն ու նրա կինը Դոնի Ռոստովում բացեցին ձեռնարկություն, որն արտադրում էր ջինսեր։ Հետագայում կոոպերատիվը վերածվեց բազմամիլիարդ դոլարանոց ռուսական ապրանքանիշի, որը հայտնի է անգամ արտերկրում։ 80-ականների վերջից ի վեր ընկերությունը մշակել է հագուստի և աքսեսուարների դիզայն fast fashion՝արագ նորաձևության հատվածում, արտադրել արտադրանք և վաճառել այն մատչելի գներով։

Իսկ ինչպե՞ս է առաջացել ընկերության անվանումը: Սկզբում Վլադիմիր Մելնիկովի կողմից ստեղծված ջինսեր արտադրող կոոպերատիվը կոչվում էր «Գլորիա»։ 1992 թվականին ընկերությունը վերանվանվեց «Մելնիկով և ընկերություն Գլորիա-2»: Եվ միայն 1995 թվականին արտադրական ձեռնարկությունը ստացավ իր ժամանակակից անվանումը, այն է «Գլորիա Ջինս»: Ընկերության հիմնադիրն անվան ընտրությունը բացատրում է նրանով, որ «գլորիան» լույս է, իսկ «ջինս»-ը ազատություն: Նրա կարծիքով, «Գլորիա Ջինս» անվանումը նշանակում է ելք խավարից դեպի լույս, ազատություն:

1991 թվականին հայտնվել է ընկերության առաջին գործընկեր խանութը Դոնի Ռոստով։ 1994 թվականին կազմակերպվել է արտադրանքի արտահանումը արտասահման՝ Անգլիա, իսկ 1995 թվականից հագուստի վաճառք է սկսվել ԱՄՆ-ում և Մոսկվայում։ Եվ միայն 2002  թվականին է ստեղծվել խանութ, որը պատկանում էր միայն ընկերությանը:

Տարիների ընթացքում Gloria Jeans-ը կայուն աճ է գրանցել և տեղափոխվել Դոնի Ռոստովից Մոսկվա։ Սկզբում խանութները գտնվում էին Ռոստովի և Լուգանսկի մարզերում, ապա աստիճանաբար բացվել են Ռուսաստանի բոլոր շրջաններում և արտերկրում։ Արդեն 2014 թվականին ընկերության խանութների թիվը 500 էր։

Այսօր Gloria Jeans-ը նորաձև հագուստի և կոշիկի խոշորագույն ռուսական մանրածախ վաճառողն է: Կորպորացիան ունի 680 խանութ երեք երկրների՝ Ռուսաստանի, Բելառուսի և Ղազախստանի ավելի քան 300 քաղաքներում: Արտադրանքի 80 %-ը կարվում է Թուրքիայի, Պակիստանի, Ուզբեկստանի, Չինաստանի, Հնդկաստանի և այլ երկրների գործարաններում: Տարեկան ավելի քան 100 միլիոն հաճախորդ է գնում այդ ընկերության արտադրանքը:  «Գլորիա Ջինս»–ում աշխատում է  15,000 մարդ, ովքեր արտադրում են 27 միլիոն միավոր հագուստ: Ռուսաստանից միջազգային ապրանքանիշերի հեռանալու հետ մեկտեղ, ռուս գնորդների հետաքրքրությունը տեղական մանրածախ առևտրականների արտադրանքի նկատմամբ աճել է: Ընկերությունը հետևում է նորաձևության միտումներին և փորձում է համընթաց քայլել արդիական օրակարգին: Կորպորացիան նաև ակտիվորեն համագործակցում է կինոյի, երաժշտության և շոու բիզնեսի հայտնի աստղերի հետ:

Կ. Խաչիկյան