«Ամուuնուu մեքենայի տակ է գցել ու uպանել, իսկ ինքն ազատության մեջ է»
ՀԱՍԱՐԱԿՈՒԹՅՈՒՆ
Մայիսի 27-ին ողբերգական հետևանքով վրաերթ էր տեղի ունեցել Գեղարքունիքի մարզի Մարտունի համայնքում։ Ժամը 21։30-ի սահմաններում Մարտունի քաղաքի Մյասնիկյան փողոցում Գեղարքունիքի մարզի բնակիչ 17-ամյա Արեգ Ա․-ն իր վարած «ՎԱԶ 2121» մակնիշի ավտոմեքենայով վրաերթի էր ենթարկել փողոցը չթույլատրելի հատվածով անցնող 25-ամյա Սերգեյ Կ․-ին, որը տեղում մահացել էր։
Դեպքի փաստով Մարտունու քննչական բաժնում նախաձեռնվել էր քրեական վարույթ։ Վարորդը տեղում ենթարկվել էր սթափության փորձաքննության, եղել է ոչ սթափ։ Վարույթի շրջանակում 17-ամյա վարորդի նկատմամբ կիրառվել են դաստիարակչական հսկողություն և բացակայելու արգելք խափանման միջոցները։
Վարորդի նկատմամբ ընտրված խափանման միջոցն, ըստ մահացածի կնոջ՝ Լուսինե Հ․-ի, բացարձակ արդարացված չէ։
«Մարդ է սպանում ու ազատության մեջ ապրում։ Ո՞նց կարող է էդպես լինել։ Ամեն օր գյուղում ուրախ-զվարթ պտտվում է, շարունակում է նույն վարքը դրսևորել»,- MediaHub-ի հետ զրույցում նեղսրտած պատմեց նա։
Մեր զրուցակիցը մեզ հետ կապ էր հաստատել, քանի որ դեպքի մասին եղած հրապարակումներն, իր խոսքով, այդքան էլ ճիշտ չեն։ Մասնավորապես, ԶԼՄ-ներում գրվեց, որ տղան դեպքի վայրից փախուստի չի դիմել ու զանգել է շտապ օգնություն։
«Ինքը փորձել է փախչել, գյուղից մի մարդ կանգնեցրել է։ Իսկ շտապ օգնություն մեր մեկ այլ համագյուղացի է զանգել։ Էդ ինչ ստեր են գրում»,- նշեց նա։
Լուսինե Հ․-ի խոսքով՝ իրենք մինչև վերջ գնալու են, որպեսզի իր ամուսնուն կյանքից զրկած մարդը օրենքի ամբողջ խստությամբ պատժվի։
«Մենք գիտենք, որ միայն երկրից հեռանալու արգելք է հիմա կիրառված, ինքը ազատ պտտվում է, կյանքը վայելում։ Բայց այդպես չպիտի լիներ։ Մենք պնդում ենք, որ այդ տղան պետք է կալանավորվի։ Մինչև դատարանի վճիռը ինչո՞ւ պիտի ազատ շրջի»,- նշեց նա։
Մեր զրուցակիցը պնդում է՝ նմանատիպ այլ դեպքեր էլ են եղել նույն վարորդի մասնակցությամբ։ «Էդ նույն օրը գյուղից մի կին ու երեխա էլ հազիվ են փրկվել ու չեն ընկել նույն մեքենայի տակ։ Միշտ էլ խմած քշել ա։ Եկեք գյուղ, ում ուզում եք, հարցրեք, բոլորն էլ կասեն, թե ինչ վարք ունի էդ տղան»,- նշեց մեր զրուցակիցը։
ՔԿ-ից մեզ հետ զրույցում ասացին, որ տղայի խափանման միջոցի փոփոխություն չի եղել։ Տղան անչափահաս է, և անզգույշ հանցագործության համար կալանքի չի տարվել։
Նարե Գնունի
