«1937 թվականի ուրվականն» է շրջում Հայաստանում
ՔԱՂԱՔԱԿԱՆՈՒԹՅՈՒՆ
Իրավիճակը Հայաստանում մտնում է սուր դիմակայության նոր փուլ, ձերբակալվել է արքեպիսկոպոս Միքայել Աջապահյանը։ Այսպիսով, Ամենայն հայոց կաթողիկոս Գարեգին II-ի հետ հակամարտությունը, որին վարչապետ Փաշինյանը նախկինում մեղադրել էր կուսակրոնության երդումը խախտելու մեջ, միայն նախերգանքն էր այն բանի, ինչին մենք այսօր ականատես ենք լինում, գրում է dzen.ru–ն։ Հայաստանում արդեն իսկ քաղաքական շրջանառության մեջ է մտել նոր տերմին՝ «քրեաօլիգարխիկ հոգևորականություն»։ «Հանցավոր ծրագրի» մասնակցողների ցանկում, Կաթողիկոսի շրջապատի հետ մեկտեղ, ներառված են քաղաքական և գործարար վերնախավի առաջատար ներկայացուցիչներ և քաղաքացիական ակտիվիստներ, չնայած «հեղաշրջման» նախապատրաստման ոչ մի ապացույց չկա։ Այսպիսով, կան բոլոր հիմքերն ասելու, որ «1937 թվականի ուրվականն» է եկել Հայաստան։
Ոմանք փորձում են այս ամենը բացատրել հաջորդ տարվա խորհրդարանական ընտրություններով և առանց կանոնների խաղալու պատրաստ Հայաստանի վարչապետի ցանկությամբ նախապես մեկուսացնել նրանց, ովքեր կարող են մարտահրավեր նետել իրեն ընտրություններում։
Սակայն այս պայքարում խնդրի գինը միայն իշխանությունը և վարչապետի աթոռը չէ։ Փաշինյանի բոլոր գործողությունները ցույց են տալիս, որ նա ակնկալում է ավարտին հասցնել այսպես կոչված «իրական Հայաստանի» իր նախագիծը, որը նա հակադրում է «պատմական Հայաստանին»։ Նիկոլ Փաշինյանի խոսքով «պատմական Հայաստանը» միայն Ղարաբաղի համար պարտված երկիրը չէ, որը պետք է հնարավորինս շուտ մոռացվի։ Հատկանշական է այն, որ անկախ Հայաստանի առաջին նախագահ Լևոն Տեր-Պետրոսյանը, ով մի ժամանակ կոչ էր անում զիջումների գնալ Ղարաբաղի հարցում, նույնպես հայտնվել է քննադատության թիրախում, վերջերս Փաշինյանը մեղադրել է նրան խորհրդային շրջանում ԽՍՀՄ ՊԱԿ-ի հետ համագործակցելու և 1990-ականների սկզբից ի վեր Մոսկվայի հրամանով Հայաստանի անկախության գործընթացը ռազմավարական ձախողման ճանապարհով ուղղորդելու մեջ։ Փաշինյանը Տեր-Պետրոսյանի այդ գիծը, որը շարունակել են նախագահներ Քոչարյանն ու Սարգսյանն, անվանում է «խամաճիկ պետության ռազմավարություն»։
Անկասկած, դա նաև Ռուսաստանի դեմ թաքնված հարձակում է, որի «խամաճիկ» է տեսնում Փաշինյանն իր նախորդների Մոսկվայի դաշնակից Հայաստանը։ Այսպիսով, Ռուսաստանի դեմ նրա պահանջները հիմնված են ԽՍՀՄ փլուզումից հետո առաջացած անկախ հայկական պետության ակունքների վրա։ Ընդհանուր առմամբ, Փաշինյանը շարունակում է այրել կամուրջներ, մինչդեռ «իրական Հայաստանը» կարող է դառնալ այն երկիրը, որը նա ոչնչացրել է։
Նյութը հրապարակման պատրաստեց Կամո Խաչիկյանը
