Տեխնոլոգիական նոր նախագծին վիճակված է չոր նավահանգստի ճակատագիրը

Բարձր տեխնոլոգիական արդյունաբերության նախարար Մխիթար Հայրապետյանը երեկ ավետել է, Հայաստանում կկառուցվի 500 միլիոն դոլար արժողությամբ Al գործարան, որը կդառնա տարածաշրջանի խոշորագույն տեխնոլոգիական նախագիծը։ Ըստ նախարարի, Հայաստանը միանում է արհեստական բանականության գլոբալ շարժին՝ ոչ որպես դիտորդ, այլ որպես նոր հնարավորություններ ստեղծող։ Firebird ընկերությունը, ՀՀ կառավարությունն ու NVIDIA-ն ամիսներ տևած նախապատրաստական աշխատանքներից հետո մեկնարկում են համատեղ նախագիծ, որն արմատապես փոխելու է մեր տարածաշրջանի տեխնոլոգիական քարտեզը։ Նախագծի շրջանակում կիրականացվի 500 միլիոն դոլարի ներդրում, կտեղակայվեն հազարավոր NVIDIA Blackwell GPU-ներ, կձևավորվի ավելի քան 100 մեգավատտ հզորությամբ ենթակառուցվածք, գործարկումը նախատեսվում է 2026 թվականին։

Հայրապետյանը նշել է, թե AI գործարանը կդառնա հարթակ նորարարությունների, կրթության, գիտության և ձեռներեցության համար։ Այն խթանելու է տեղական ու միջազգային ստարտափների զարգացումը, ապահովելու է գիտության ու տեխնոլոգիայի կապը, և Հայաստանը կդարձնի տարածաշրջանային տեխնոհաբ՝ արհեստական բանականության իրական ստեղծման վայր, բավականին ճոխ ներկայացրել է նախարարը։

Դրանից հետո իշխանական ողջ քարոզչամեքենան լցվել է հերթական նախագիծը հանրության աչքին ավելի ուռճացնելու գործին։ Մինչդեռ հայ հասարակությունը վաղուց այլևս չի հավատում Նիկոլ Փաշինյանի իշխանությանը, իսկ նման նախագծերի մասին ազդարարվել է յոթ տարի շարունակ, բայց որևէ դեպքում գործող իշխանությունը մինչև վերջ չի հասցրել ոչ մի նախագիծ, ընդհակառակը մեծ թափով ազդարարված բոլոր նախագծերը կարճ ժամանակ անց սուսուփուս ծածկադմփոց են արել։

Ըստ էության, նոր նախագծին վիճակված է Գյումրիի չոր նավահանգստի ճակատագիրը։ 2019 թ․-ին կառավարությունը մեծ հանդիսավորությամբ ներկայացրեց այդ նախագիծը, որի գաղափարն էր Գյումրին դարձնել տարածաշրջանային լոգիստիկ հաբ, խաչմերուկ՝ Հյուսիս-Հարավ և Արևելք-Արևմուտք տրանսպորտային հոսքերի համար։ Նախագծով նախատեսված էր բեռնատար երթուղի մինչև Թուրքիա, Վրաստան և Իրան, մաքսային ու բեռնային արագ կարգավորում, տարանցիկ մոդել՝ միջինասիական բեռների համար, ներդրումներ՝ մոտ 30 մլն դոլար։

Բայց արդյունքում այսօր ունենք մի իրավիճակ, որ Գյումրիի չոր նավահանգիստը պարզապես գոյություն չունի, ոչինչ չի արվել։ Փոխարենը տարածաշրջանային հաբ է դարձել Վրաստանը։

Ակնհայտ է, որ հերթական նախագիծը, այն էլ նախընտրական տարում հանրությանը ներկայացնելով, փաշինյանական իշխանությունն ընդամենը նպատակ է հետապնդում՝ նոր ձայներ կորզել հանրությունից, իբր լուրջ աշխատանք են տանում։ Փաստացի մի քանի 100 մանկապարտեզ վերանորոգելուց և կիսատ-պռատ ասֆալտապատումից բացի գործող իշխանությունները որևէ հարցում չեն հաջողել, իսկ ձախողումների մասին կարելի է պարզապես հատորյակներ գրել։

Գայանե Ղուկասյան